İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 260 Hüküm no: 242 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaçak Agop ve ortağına ait Saraçhanebaşı’ndaki ekmekçi fırını ve Unkapanı’ndaki değirmen gediğinin borçlarına karşılık kayyım ve vasî Ekmekçiler Kethudası marifetiyle Abdülvahhab Ağa ve kardeşi Kasım Ağa’ya sekiz bin guruşa satıldığı İstanbul ve tevâbi‘inde vâki‘ ekmekçi ve uncu esnâfı vakit ve zamanıyla altı aylık zahîre der-anbâr ve narh-ı rûzî üzere tâmmü’l-vezn dakīk bey‘ ve tabhı nisâbında nân-ı azîz işleyüp mutasarrıf oldukları ve fırın ve değirmenlerini kapamamak ve gediklerini âhara bey‘ ve îcâr ve i‘âre murâd eylediklerinde kethudâları ve nizâm ustaları ma‘rifetleriyle fırın ve değirmeni idâreye kādir mu‘temed ve mütemevvil olup ve ber-vech-i muharrer bey‘ ve îcârları cümle ma‘rifeti ve nizâm ustaları kefâletiyle İstanbul kādısı huzûrunda tescîl olunup cânib-i mîrîden ve kapan tüccârından ve müste’men tâifesinden aldıkları zahîrenin akçesini edâda cefâ ve tehir etmemek nizâm-ı kadîmlerinden olup ve işbu şurût-ı nizâm üzere hareket etmeyenlerin fırın ve değirmen gedikleri âhara verilmek dahi şürût-ı nizâmlarından olmağla, İstanbul’da Saraçhâne başında Haffâfhâne karşusunda bir bâb ekmekçi fırını ve kapan-ı dakīk dâhilinde Pâydos Değirmeni demekle ma‘rûf yirmi sehim i‘tibâr olunan beş horoslu bir bâb [74a] uncu değirmeni gedikleri yedlerinde mülkleri iken firâr eden Agop ve şerîki ( ) zimmînin hınta bahâsından cânib-i mîrîye bin sekiz yüz elli beş guruş ve kapan tüccârına dört bin altmış beş guruş ve el-Hâc Ali Efendi nâm kimesneden istidâne edip mukābelesinde on bargiri istiğlâl olan iki bin seksen guruş ki cem‘an sekiz bin guruş deynleri olup ve zikrolunan fırın ve değirmen mu‘attal ve kirâsı ashâbına verilmemekle gāibân-ı mesfûrânın zikrolunan fırın ve değirmende gedik ta‘bîr olunur mâlik oldukları yirmi re’s bargir ve sâir âlât-ı lâzıme ve eşyâ-i ma‘lûmelerini edâ içün merkūm el-Hâc Ali Efendi’nin izin ve rızâsıyla semen-i misilleriyle bey‘a kıbel-i şer‘den vasî ve kayyım nasb olunan Habbâzân Kethudâsı Mustafa Ağa nâm kimesne zikri âtî bargir ve âlât-ı sâireyi düyûn-ı mezkûreyi edâ etmek içün nizâm ustaları ma‘rifetleriyle zikrolunan gedikleri Kapan-ı dakīk’de müzâyede ve bâlâda tafsîl olunduğu üzere sâlifü’l-beyân fırın ve değirmeni idâreye kādir olduğu esnâfdan mazbûtü’l-esâmî kimesneler ihbâr ve yine esnâfdan mu‘temed ve mütemevvil ustalardan her biri kefîl oldukları bâ‘isü’l-kitâb es-Seyyid el-Hâc Abdülvahhab Ağa ve karındaşı es-Seyyid el-Hâc Kasım Ağa üzerlerinde beher bargir dörder yüz guruşdan on iki re’s bargir dört bin sekiz yüz guruşda merkūm es-Seyyid el-Hâc Abdülvahhab Ağa üzerinde ve sekiz re’s bargir üç bin iki yüz guruşda mezbûr es-Seyyid el-Hâc Kasım Ağa üzerinde karâr-dâde ve ziyâde ile tâlib-i âharı zuhûr etmeyüp ve meblağ-ı mezkûr mârrü’z-zikr bargir ve sâir âlât-ı lâzıme-i ma‘lûmenin el-yevm semen-i mislinden ezyed olduğu ihbâr olunmağla, vasî-i merkūm Mustafa Ağa dahi zikrolunan fırın ve değirmen gedikleri ta‘bîr olunur yirmi re’s bargiri sâir âlât-ı ma‘lûmeleriyle karâr-dâde olduğu vech üzere merkūmân es-Seyyid el-Hâc Abdülvahhab ve es-Seyyid el-Hâc Kasım ağalara bi’l-vesâye bey‘ ve temlîk ve teslîm, onlar dahi rızâlarıyla ba‘de’l-iştirâ ve’l-kabûl semenleri olan meblağ-ı mezkûr cem‘an sekiz bin guruşu cânib-i mîrîye ve kapan tüccârına hınta bahâsından olan deyn ile merkūm el-Hâc Ali Efendi’nin alacağı olduğu sübût bulunan meblağ-ı mezkûra ba‘de’l-havâle ve’l-kabûl, ol dahi edâya ta‘ahhüd etmeğin mâ-vaka‘a bi’t-taleb ketb olundu. Fî 21 Zilka‘de sene [11]94. Şuhûdü’l-hâl: [İlk satırın başı kısmen kesik] el-Hâc Ahmed Ağa, Yiğitbaşı es-Seyyid Mehmed Emin, es-Seyyid Mehmed Said, Bedirzâde Ali.