İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 262 Hüküm no: 243 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belgrad Defterdarı Mehmed Emin Efendi b. İsmail Ağa’nın borç alış-verişi, arsa devri ve menzil satışı muamelelerinden Kirkor v. Arutin’e yirmi iki bin beş yüz elli yedi guruş borcu kaldığı Hâcegân-ı Dîvân-ı hümâyûndan hâlâ Belgrad Defterdârı olan umdetü erbâbü’t-tahrîr ve’l-kalem Mehmed Emin Efendi b. İsmail Ağa meclis-i şer‘-i hatîr-i lâzımü’t-tevkīrde İstanbul’da Sofcılar hânı mütemekkinlerinden Tıngıroğlu demekle meşhûr bâ‘isü’s-sifr Kirkor v. Arutin zimmînin sulbî kebîr oğlu ve tarafından husûs-ı âti’z-zikrde vekîl-i sâbitü’l-vekâlesi Simyon nâm zimmî muvâcehesinde ikrâr-ı tâm ve takrîr-i kelâm edip müvekkil-i mesfûr Kirkor zimmî ile doksan bir senesinden işbu târih-i <> kitâba gelince beynimizde cereyân eden bi’l-cümle ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan müvekkil-i mesfûr Kirkor zimmî ile oğlu vekîl-i mesfûr Simyon zimmîden her birinin zimmetini ibrâ-i âm ile ibrâ ve ıskāt eylediğimde, onlar dahi ibrâ-i mezkûru kabûl eylediklerinden sonra müvekkil-i mesfûr Kirkor zimmî yedine def‘ ve i‘tâ ettiğim memhûr temessüküm mûcebince kendüye deynim olan elli dokuz bin sekiz yüz otuz guruşun yirmi dört bin yedi yüz yetmiş üç guruşunu edâ ve teslîm ve vasîsi olduğum merhûm Surre Emînizâde es-Seyyid Mehmed Said Efendi’nin sulbî sagīr oğlu Mehmed Esad’ın mâlından müvekkil-i mesfûra bi’l-vesâye idâne ve teslîm eylediğim beş bin guruşu sagīr-i mezbûra kendi deynim olmak üzere temessük verüp müvekkil-i mesfûra bâkī deynim olan otuz beş bin elli yedi guruşun beş bin guruşuna takās ve mahsûb ve mahmiye-i İstanbul’da Hammâmî Muhyiddin Mahallesi’nde vâki‘ bir tarafdan Kādı Sadi Efendi Mescid-i şerîfi Vakfı’ndan menâzil arsası ve ba‘zan mescid-i mezbûr imâmlarına meşrûta bağçe ve bir tarafdan gallesi mârrü’z-zikr Hammâmî Muhyiddin imâmlarına meşrûta hâriciye menzil ve iki tarafdan tarîk-i âm ile mahdûd arsasının Kādı Sadi Efendi Vakfı’na senede iki bin dört yüz doksan akçe ve mârrü’l-beyân Hammâmî Muhyiddin Vakfı’na senede bin iki yüz otuz akçe ve Ümmühani Hatun Vakfı’na senevî üç yüz altmış ve Duhan Gümrükçüsi Hasan Ağa Vakfı’na senede üç yüz altmış akçe mukāta‘aları ve üzerinde olan ebniyesi iki kıt‘a hüccet-i şer‘iyye ile mülküm olup zikrolunan hüccetlerde muharrer büyût-ı adîde ve müştemilât-ı sâireyi hâvî mülk menzilimin ebniyesini, tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi-cümletin mâ-yeştemiluhû ve yahvîhi sekiz yüz altmış guruşa müvekkil-i mesfûra bey‘ ve temlîk ve teslîm arsası dahi mütevellîleri ma‘rifetiyle altı bin altı yüz kırk guruş bedel mukābelesinde ferâğ ve tefvîz [75a] eylediğimde, ol dahi ebniye-i mezkûreyi ber-minvâl-i muharrer iştirâ ve temellük ve tesellüm ve kabz ve arsa-i mezkûreyi kezâlik tefevvüz ve kabûl edip semen-i mezkûr ile bedel-i merkūm cem‘an yedi bin beş yüz guruşu dahi bâkī deynim olan otuz bin elli yedi guruşun yedi bin beş yüz guruşuna takās ve mahsûb eylediğimde, ol dahi mukāssa ve kabûl edip fîmâ-ba‘d ebniye-i memlûke-i mezkûre ile arsa-i mevkūfe-i mezbûrede benim asla ve kat‘â alâka ve medhalim kalmayup ebniye-i mezkûre müvekkil-i mesfûrun mülk-i müşterâsı ve arsa-i mevkūfe mülk-i müfevvezi olup ve müvekkil-i mesfûra zimmetimde bâkī yirmi iki bin beş yüz elli yedi guruş deynim kalup ve meblağ-ı mezkûr yirmi iki bin beş yüz elli yedi guruş mesfûr Kirkor zimmîye zimmetimde vâcibü’l-edâ ve lâzımü’l-kazâ deynimdir dedikde vekîl-i mesfûr Simyon zimmî dahi mukırr-i mûmâ-ileyh es-Seyyid Mehmed Emin Efendi’yi cemî‘ kelimât-ı meşrûhasında tasdîk etmeğin mâ-vaka‘a bi’t-taleb ketb olundu. Hurrire fî 25 Zilka‘de [li-]sene [11]94. Şuhûdü’l-hâl: es-Seyyid Mehmed Tahir Efendi, Mehmed Emin Efendi, Mustafa Efendi, Mehmed Ağa b. Ahmed, es-Seyyid Mehmed Sâdık.