İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 263 Hüküm no: 244 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed Said’in vasîsinin Ayasofya’daki çörekçi dükkânı gediğini Hasan Beşe b. Veliyüddin’e yıllık bin beş yüz guruşa kiraladığı Ayasofya’da çörekçi Mahmiye-i İstanbul’da Ayasofya’da çörekçi iken bundan akdem vefât eden Mehmed Said b. Mehmed’in sulbî sagīr oğlu Mustafa’nın bâ-hüccet-i şer‘iyye vasî-i muhtârı işbu bâ‘isü’l-kitâb es-Seyyid el-Hâc Osman b. es-Seyyid Mehmed nâm kimesne meclis-i şer‘-i hatîr-i lâzımü’t-tevkīrde müteveffâ-yı mezbûrun dükkânında hayatında halîfesi olup çörekçi esnâfının usta olmak üzere i‘tibâr eyledikleri Hasan Beşe b. Veliyüddin nâm kimesne mahzarında ikrâr-ı tâm ve takrîr-i kelâm edip müteveffâ-yı mezbûr Mehmed Said’in ile’l-vefât yedinde mülkü ve ba‘de vefâtihî vasîsi olduğum oğlu mezbûr Mustafa’ya intikāl edip zikrolunan Ayasofya’da vâki‘ bir bâb çörekçi dükkânında mevcûde beyne’l-esnâf gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmesini, işbu sene-i mübâreke Zilhiccetü’ş-şerîfesi gurresinden beher sene bin beşer yüz guruşa örf-i belde ve âdet-i esnâf üzere mezbûr Hasan Beşe’ye bi’l-vesâye îcâr ve teslîm eylediğimde, ol dahi ber-vech-i muharrer istîcâr ve kabûl eylediğini mezbûr Hasan Beşe ba‘de’t-tasdîk zikrolunan senevî bin beş yüz guruş icâreyi dahi vech-i muharrer üzere vasî-i merkūma tamamen edâ ve teslîm etmek üzere ta‘ahhüd etmeğin mâ-vaka‘a bi’t-taleb ketb olundu. Hurrire fî 29 Zilka‘de [li-]sene [1]194. Şuhûdü’l-hâl: Mehmed Emin Efendi, Mehmed Ağa b. Ahmed, es-Seyyid Mehmed Sâdık, [75b] Edirnelizâde el-Hâc Mehmed Ağa, Molla Mustafa, Çörekçiler Kethudâsı Osman Ağa, Yusuf Usta, Ahmed [Usta], Halil Usta, Süleyman Efendi, İbrahim Usta, el-Hâc Ömer, el-Hâc Hüseyin.