İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 264 Hüküm no: 245 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Kazer ve Arakil’e ait Mahmudpaşa yakınındaki ekmek fırını ve değirmeni gediğinin borçlarına karşılık kayyım ve vasî olan Ekmekçiler Kethudası marifetiyle oğullarına beş bin guruşa satıldığı İstanbul ve tevâbi‘inde vâki‘ ekmekçi ve uncu esnâfı vakit ve zamanıyla altı aylık zahîre der-anbâr ve narh-ı rûzî üzere tâmmü’l-vezn dakīk bey‘ ve tabhı nisâbında nân-ı azîz işleyüp mutasarrıf oldukları ve fırın ve değirmenlerini kapamamak ve gediklerini âhara bey‘ ve îcâr ve i‘âre murâd eylediklerinde kethudâları ve nizâm ustaları kefâletiyle İstanbul kādısı huzûrunda tescîl olunup cânib-i mîrîden ve kapan tüccârından ve müste’men tâifesinden aldıkları zahîrenin akçesini edâda cefâ ve tehir etmemek nizâm-ı kadîmlerinden olup ve işbu şurût-ı nizâm üzere hareket etmeyenlerin fırın ve değirmen gedikleri âhara verilmek dahi şürût-ı nizâmlarından olmağla, İstanbul’da Mahmud Paşa kurbünde Şişehâne fırını demekle ma‘rûf bir bâb ekmekçi fırını ve ona merbût derûnunda kâin on altı sehim i‘tibâr olunan dört horoslu bir bâb değirmen gediği yedlerinde mülkleri iken müte‘âkıben hâlikân olan Kazer ve Arakil’in cânib-i mîrî ve Kapan tüccârına dört bin yedi yüz elli guruş ve Sarrâf Varteris zimmîden istidâne edip mukābelesinde on bargirî istiğlâl olan üç bin iki yüz elli guruş ki cem‘an sekiz bin guruş deynleri olup ve zikrolunan fırın ve değirmen mu‘attal ve kirâsı ashâbına verilmemekle hâlikân-ı mesfûrânın zikrolunan fırın ve değirmende gedik ta‘bîr olunur mâlik oldukları on altı re’s bargir ve sâir âlât-ı lâzıme ve eşyâ-i ma‘lûmelerini deyn-i mezkûra edâ içün mesfûr Sarrâf Varteris zimmînin izin ve rızâsıyla semen-i misilleriyle bey‘a kıbel-i şer‘den vasî ve kayyım nasb ve ta‘yîn olunan Habbâzân Kethudâsı Mustafa Ağa nâm kimesne zikri âtî bargir ve âlât-ı sâiresini düyûn-ı mezkûreyi edâ etmek içün nizâm ustaları ma‘rifetleriyle zikrolunan gediklerden on re’s bargir ve sâir âlât-ı ma‘lûme Kapan-ı dakīk’de müzâyede olundukda, bâlâda tafsîl olunduğu üzere sâlifü’l-beyân on re’s bargirin beş re’sini fırın ve değirmeni idâreye kādir olduğu esnâfdan mu‘temed ve mütemevvil ustalardan her biri kefîl oldukları hâlik-i mesfûr Kazer’in oğulları Melkon ve Markos zimmîler üzerlerinde üç bin guruşda ve beş re’sini kezâlik idâreye kādir olup esnâfın kefîl oldukları Arakil zimmînin oğulları bâ‘isâ’s-sifr Kasber ve Avanes zimmîler üzerlerinde iki bin guruş ki cem‘an beş bin guruşda karâr-dâde ve ziyâde ile tâlib-i âharı zuhûr etmeyüp ve meblağ-ı mezkûr mârrü’z-zikr bargir ve sâir âlât-ı lâzıme-i ma‘lûmenin el-yevm semen-i mislinden ezyed olduğu ihbâr olunmağla, vasî-i merkūm Mustafa Ağa dahi zikrolunan fırın ve değirmen gedikleri ta‘bîr olunur on altı re’s bargirden yalnız on re’s bargiri sâir âlât-ı ma‘lûmeleriyle mesfûrûn [76a] Melkon ve Markos ve Kasber ve Avanes zimmîlere vech-i muharrer üzere bi’l-vesâye bey‘ ve temlîk ve teslîm, onlar dahi rızâlarıyla ba‘de’l-iştirâ ve’l-kabûl semenleri olan meblağ-ı mezkûr cem‘an beş bin guruşu cânib-i mîrî ve Kapan tüccârına hınta bahâsından olan dört bin yedi yüz elli guruşu cânib-i mîrî ve Kapan tüccârına ve bâkīsi olan <> iki yüz elli guruşu mesfûr Varteris zimmîye edâ ve teslîme ta‘ahhüd etmeğin mâ-vaka‘a bi’t-taleb ketb olundu. Hurrire fî 13 min-Zilka‘de [li-]sene [1]94. Şuhûdü’l-hâl: Yiğitbaşı es-Seyyid Mehmed Emin Ağa, Sayıcı Molla Osman, Bediroğlu Ali, es-Seyyid el-Hâc Ahmed, Çörekçi Molla Ahmed.