İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 266 Hüküm no: 247 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp Kadı Mehmed Efendi üzerine karısı Afîfe bt. Abdullah için günlük otuz para takdir edildiği Mahmiye-i İstanbul’da Hırka-i şerîfe kurbünde Akseki Mahallesi sâkine ve zâtı ta‘rîf-i şer‘î ile mu‘arrefe olan Afîfe bt. Abdullah nâm hatun meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip zevcim Anadolu kuzâtından Mehmed Efendi nâm kimesne sekiz aydan berü bilâ-nafaka ve lâ-münfikk-ı şer‘î beni terk ve diyâr-ı âhara gitmekle nafakaya eşedd-i ihtiyâcım olmağla, zevcim gāib-i merkūm Mehmed Efendi üzerine cânib-i şer‘den kadr-ı ma‘rûf nafaka-bahâ farz ve takdîr olunmak murâdımdır dedikde fi’l-hakīka hâl mezbûre Afîfe Hatun’un bâlâda tahrîr ve tafsîl ve beyân olunduğu üzere ve zikri âtî meblağ kadr-ı ma‘rûf olduğunu vukūf-ı tâmları olan mahalle-i mezbûre ahâlîsî ile sâir bî-garaz kimesneden olup zeyl-i vesîkada muharrerü’l-esâmî Müslimîn alâ-tarîkı’ş-şehâde haber verdiklerinden sonra mezbûre Afîfe Hatun ba‘de’t-tahlîfi’ş-şer‘î hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri dahi merkūme Afîfe Hatun’un nafakası’çün zevci gāib-i merkūm Mehmed Efendi üzerine târih-i kitâbdan beher yevm otuzar para farz ve takdîr buyurup meblağ-ı mefrûz-ı mezkûru kendinin nafaka ve sâir havâyic-i zarûriyesine harc ve sarfa ve lede’l-iktizâ istidâneye ve inde’z-zafer zevci gāib-i mezbûr Mehmed Efendi üzerine rücû‘a mezbûre Afîfe Hatun’a izin vermeğin mâ-vaka‘a bi’t-taleb ketb olundu. Fî-gurre-i Zilhicceti’ş-şerîfe li-sene erba‘a ve tis‘în ve miete ve elf. Şuhûdü’l-hâl: Mehmed Emin Efendi, es-Seyyid Ali Ağa b. Veliyüddin, es-Seyyid Hasan Ağa b. Halil, Mustafa Ağa b. Mustafa, Mustafa Ağa.