İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 266 Hüküm no: 248 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Osman ile eski ortağı Abdullah Beşe b. Mehmed’in hesaplaşıp birbirlerinin zimmetini ibra ettikleri Galata kapanı tüccârından es-Seyyid İbrahim Beşe b. Osman nâm kimesne meclis-i şer‘-i hatîr-i lâzımü’t-tevkīrde şerîki işbu bâ‘isü’l-kitâb Abdullah Beşe b. Mehmed nâm kimesne mahzarında ikrâr-ı tâm ve takrîr-i [kelâm edip] mezbûr Abdullah Beşe yağ ve bal ve emti‘a-i sâire bey‘ ve şirâsına şerîk-i inân ile şerîkim olup beynimizde bir müddet mu‘âmelât ve ahz ü i‘tâ cârî olup ba‘dehû fesh-i akd-i şirket ve hesâb-ı sahîh ile tüccâr beyninde hesâbımızı rü’yet eylediğimizde, benim mezbûr Abdullah Beşe zimmetinde bin iki yüz guruş hakkım zuhûr ettikde, mezbûr Abdullah Beşe meblağ-ı mezkûr zimmetinde bana deyni olduğunu ikrâr-ı kat‘î ile ikrâr ettikden sonra meblağ-ı mezkûr bin iki yüz guruşu işbu meclis-i şer‘de bana tamamen edâ ve teslîm, ben dahi ber-vech-i muharrer yedinden ahz ü kabz edip fîmâ-ba‘d husûs-ı şirket ve re’s-i mâl ve fâideye ve sâir beynimizde cereyân eden bi’l-cümle ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Abdullah Beşe’nin zimmetini ibrâ-ı âm ile ibrâ ve ıskāt, ol dahi kezâlik husûs-ı mezkûra ve sâir beynimizde cereyân eden bi’l-cümle ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan benim zimmetimi ibrâ-i âmm-ı <> kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt ve her birimiz âharın ber-minvâl-i muharrer ibrâsını kabûl eyledik dediğini mezbûr Abdullah Beşe tasdîk etmeğin mâ-vaka‘a bi’t-taleb ketb olundu. Fî 5 min-Zilhicce sene [1]194. Şuhûdü’l-hâl: Kādızâde el-Hâc Mehmed, Edirnelizâde el-Hâc Mehmed, Tophâneli Mustafa, Hammâmîzâde İbrahim, el-Hâc Yusuf.