İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 267 Hüküm no: 249 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağyunus Camii Vakfı’na ait câmi, mekteb ve dükkânları tamir ve tecdid ettiren mütevellî için keşif ve masraf tahmin vesikası ve rakamın muhasebeye işlenmesine izin verildiği Mahmiye-i İstanbul’da Sultân Selim kurbünde Debbağyunus Mahallesi Câmi‘-i şerîfi Vakfı’nın mütevellîsi bâ‘isü’l-vesîka İmâm Abdullah Efendi b. ( ) meclis-i şer‘-i şerîf-i enverde bi’t-tevliye takrîr-i kelâm ve ta‘bîr ani’l-merâm edip câmi‘-i şerîf-i mezbûrun ekser mevâkı‘i harâb ve inhidâma mâil olup ta‘mîr ve termîme eşedd-i ihtiyâc ile muhtâc olmağla yedimde mevcûd galle-i vakf-ı mezbûrdan kadr-ı ma‘rûf meblağ ile ta‘mîr ve termîm ve tecdîde bâ-hüccet-i şer‘iyye kıbel-i şer‘den me’zûn olduğuma binâen câmi‘-i şerîf-i mezbûr ve ittisâlinde vâki‘ mekteb-i latîf ve dükkânların iktizâ eden mahallerini yedimde mevcûd galle-i vakf-ı mezbûr ile ta‘mîr ve termîm ve tecdîd ve tekmîl eylediğim bundan akdem sâdır olan fermân-ı âlîlerine imtisâlen kıbel-i şer‘den mürsel Kâtib Ahmed Efendi ve Hâssa mi‘mârı hulefâsından el-Hâc Abdullah Halîfe ma‘rifetleriyle ahâlî-i mahalle-i mezbûreden mazbûtü’l-esâmî Müslimîn hazır oldukları hâlde keşf ve misâha ve tahrîr ve tahmîn olundukda, işbu yedimde olan bir kıt‘a mümzâ ve mahtûm Mi‘mâr Ağa defteri nâtık olduğu üzere mahâll-i mezkûrenin ta‘mîr ve termîm ve tecdîdine mikdâr-ı masrûfum bin üç yüz elli dört buçuk guruşa bâliğ olmağla mahâll-i mezkûrenin ta‘mîr ve termîmî meblağ-ı merkūm ile ancak vücûda gelir noksan ile mümkün değildir deyü mi‘mâr-ı merkūm ve Müslimûn-ı hâzırûn icmâ‘ ve ittifâk etmeleriyle ebniye-i mezkûreye masrûfum olan meblağ-ı merkūm vakf-ı mezbûrun muhâsebesine idhâl olunmak üzere kıbel-i şer‘den bana izin verilmek bi’t-tevliye matlûbumdur dedikde hakīkat-i hâl mütevellî-i mezbûrun takrîr-i meşrûhu üzere olduğunu zeyl-i vesîkada muharrrerü’l-esâmî Müslimîn ihbârlarıyla zâhir ve mütebeyyin olmağın hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri dahi ebniye-i mezkûreye masrûfu olan meblağ-ı merkūm bin üç yüz elli dört buçuk guruşu hîn-i hesâbda vakf-ı mezbûrun muhâsebesine idhâle mütevellî-i mezbûra izin vermeğin mâ-vaka‘a bi’t-taleb ketb olundu. Fî-gurre-i Zilhicceti’ş-şerîfe li-sene erba‘a ve tis‘în ve miete ve elf. Şuhûdü’l-hâl: Kapu Çukadârı Ahmed Ağa, eş-Şeyh el-Hâc Ahmed Efendi, Müezzin Molla Nu‘man b. Hasan, el-Hâc Ahmed b. Abdullah, İsmail Efendi b. Abdullah, Mehmed Ağa b. İsmail, es-Seyyid İbrahim Efendi b. Mustafa, Hoca Hâfız Mehmed Efendi b. İsmail, Za‘îm Mustafa Ağa b. Mustafa, el-Hâc Mustafa b. Abdullah.