İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 268 Hüküm no: 250 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Toma v. Kirkor ve Sahak kardeşlerin Makrahora köyündeki ekmek fırınının altı hissesini Nikola v. İstori ve Kosta v. Dimo ve Pano v. Kiro’ya bin guruşa sattıkları Habbâz tâifesinden olup on iki sehim i‘tibâr olunan zikri âtî Makrahora karyesinde vâki‘ bir bâb habbâz fırınının altı sehmine mutasarrıfân olan Toma ve Sahak veledey Kirkor nâm zimmîler meclis-i şer‘-i hatîr-i lâzımü’t-tevkīrde sihâm-ı bakıye-i mezkûre altı sehmin ikişer sehmine mutasarrıflar olan [77a] bâ‘isü’l-kitâb Nikola v. İstori ve Kosta v. Dimo ve Pano v. Kiro nâm zimmîler muvâcehelerinde ikrâr-ı tâm ve takrîr-i kelâm edip akd-i âti’z-zikrin sudûruna [değin] yedimizde mülkümüz olup zikrolunan Makrahora karyesinde vâki‘ bir bâb habbâz fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden mutasarrıflar olduğumuz altı sehmimizi ifrâz ve kemâl-i imtiyâz ile mümtâz edip mesfûrûn Nikola ve Kosta ve Pano zimmîlerden istidâne ve kabz eylediğim yalnız bin guruş mukābelesinde altı sehim hissemizi tarafeynden îcâb ve kabûlü hâvî alâ-tarîkı’l-bey‘ bi’l-vefâ mesfûrûn Nikola ve Kosta ve Pano zimmîlere bey‘ ve teslîm eylediğimizde, onlar dahi ber-vech-i muharrer iştirâ ve tesellüm ve kabz edip inşâ’Allahu te‘âlâ deynimiz olan meblağ-ı merkūm yalnız bin guruşu mesfûrlara edâ ve teslîm eylediğimizde, onlar dahi altı sehim âlât-ı mezkûreyi bizlere redd ve teslîme ta‘ahhüd eylediler dediklerini mesfûrûn Nikola ve Kosta ve Pano zimmîler tasdîk etmeğin mâ-vaka‘a bi’t-taleb ketb olundu. Fî 29 min-Şevvali’l-mükerrem sene [1]194. Şuhûdü’l-hâl: el-Hâc Ahmed Ağa, Yiğitbaşı es-Seyyid Mehmed Emin, es-Seyyid Mehmed Said, Uncular Kethudâsı Mustafa, Mikail v. İstefan, Vartan v. Tomas, Bedros v. Bogos.