İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 269 Hüküm no: 251 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeytinci es-Seyyid el-Hâc Mehmed Ağa b. es-Seyyid el-Hâc Mustafa’nın Ayazma Kapısı dışındaki zeytinci dükkânı gediğini ve sâir eşyalarını İsmail Beşe b. Hasan’a bin beş yüz guruşa sattığı Zeytüncü Mahmiye-i İstanbul hısnı ebvâbından Ayazma Kapısı hâricinde zeytuncu olan es-Seyyid el-Hâc Mehmed Ağa b. es-Seyyid el-Hâc Mustafa nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb İsmail Beşe b. Hasan mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülküm olup zikrolunan Ayazma Kapısı hâricinde vâki‘ bir bâb zeytuncu dükkânında mevcûde beyne’l-esnâf gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr İsmail Beşe’ye bin guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ve dükkân-ı mezkûr derûnunda olup zeytuncu esnâfına müte‘allik olan eşyâ-i ma‘lûmemi dahi kezâlik merkūm İsmail Beşe’ye beş yüz guruşa bey‘ ve temlîk ve teslîm eylediğimde, eşyâ-i mezkûreyi dahi kezâlik iştirâ ve temellük ve tesellüm ve kabz ve kabûl ettikden sonra semenleri olan cem‘an bin beş yüz guruşu mezbûr İsmail Beşe zimmetinde terk ve kendüm bu sene-i mübârekede Hâcc-ı şerîfe azîmet ve inşâ’Allahu te‘âlâ ol emâkin-i mu‘teberede mücâviret etmek üzere niyet edip ve inşâ’Allahu’r-Rahmân mezbûr İsmail Beşe zimmetinde bana deyni olan meblağ-ı merkūm bin beş yüz guruşun beş yüz guruşunu doksan beş senesi Recebi’l-ferdi’nin gurresinde işbu hazır bi’l-meclis Hâfız İbrahim Efendi’ye emrim ile verüp, ol dahi ba‘de’l-ahz bana irsâl ve îsâl etmek üzere ol târihde Surre Emîni bulunan ağaya yine emrim ile teslîm ve bana irsâl ve îsâl ve bâkīsi olan bin guruşun beş yüz guruşunu dahi kezâlik doksan altı senesi Recebi’nde ve bâkīsi olan beş yüz guruşu ber-vech-i muharrer doksan yedi senesi Recebi’nde kezâlik merkūm Hâfız İbrahim Efendi’ye teslîm, ol dahi minvâl-i meşrûh üzere bana irsâl ve îsâl eylesün dedikde mezbûrân İsmail Beşe ve Hâfız İbrahim’den her biri ber-vech-i muharrer amel ve hareket etmek üzere ba‘de’t-ta‘ahhüd meblağ-ı merkūm bin beş yüz guruşun edâsına dahi mezbûr İsmail Beşe’nin kayınpederi işbu Ali Efendi b. Halil dahi kefîl ve dâmin olmuşdur dediğini mezbûrûn İsmail Beşe ve Hâfız İbrahim ve Ali Efendi’den her biri tasdîk etmeğin mâ-vaka‘a bi’t-taleb ketb olundu. Fî-gurre-i Zilhicce sene [1]194. Şuhûdü’l-hâl: Hâfız Sadullah Efendi, Hâfız Mehmed Said Efendi, Zeytüncü İsmail, Kanlıfırınlı el-Hâc Ahmed, Hasan Efendi, Kethudâ el-Hâc Osman, Hacı Ali, Mehmed Odabaşı.