İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 271 Hüküm no: 253 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul baratacılar esnafı nizamı fermanı Baratacı emri Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâ’ ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı ‒zîdet fezailehû‒ ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtass bi-mezîd-i inâyeti’l-melikü’d-dâim bi’l-fi‘il Hâssam Bostancıbaşısı mîr Ali ‒dâme mecduhû‒ tevkī‘-i refî‘-i hümâyûn vâsıl olıcak ma‘lûm ola ki Baratacı ustaları Karabet ve Neven ve Kosta ve Tenmo ve İstadori nâm zimmîlerin verdikleri arzuhâlleriyle nazm-ı hâl edip bundan akdem barata işlemek yalnız üç aded dükkâna mahsûs olmağla a‘lâ zâbitân baratası dört guruşa ve neferât baratası üç ve üç buçuk guruşa vermek üzere ta‘ahhüd eylemişidik şimdi içimize kalpakçı tâifesinden ve sâirden ecnebi karışup ve al boya boyayup ve barata çukasını geldikçe bizden gayrı kimesne almaz iken hufyeten üçer dörder guruş ziyâde[ye] alup baratanın her bir adedi altışar ve yedişer guruşa çıkup diledikleri gibi füruht etmeleriyle nizâmımızın ihtilâline bâ‘is [78b] oldular deyü iştikâlarına binâen ellerinde mevcûd çukalarını getirdüp nümûne olmak üzere barata kesdirüp elli zirâ‘ çukadan her bir barata yedişer rub‘ olmak üzere yüz yirmi aded barata çıkup fiyât-ı meşrûhası üzere a‘lâ zâbitân baratası ma‘a harc-ı dökme beş buçuk guruş on paraya, evsat çukanın baratası dört buçuk guruş, ednâ çukanın baratası dört guruş bir rub‘ ile hesâb olundukda, cevâblarında gerçi bu çukaları mukaddemâ bu fiyât ile almışidik şimdi ecnebilerin ziyâde bahâ ile aldıklarına binâen ve bizlerden dahi ziyâde talebiyle bir dürlü çuka alamayup san‘atımız muhtel ve müşevveş olmasına bâdî olmalarıyla, kemâ-fi’l-evvel nizâm[a] rabt birle beş nefer ustaları ve Ayasofya’da bir aded meremmâtcı ve Meydâncık’da bir aded meremmâtcı dükkânından mâ‘adâ gerek Kalpakçılar ve sâiri barata işlememek bâbında emr-i şerîf-i âlî-şânım sudûrunu istid‘â ve istirhâm eyledikleri ecilden ber-vech-i meşrûh istid‘âlarına müsâ‘ade-i aliyyem erzânî kılınmasını ve fîmâ-ba‘d zikr <> olduğu fiyât üzere işleyüp ziyâdeye füruht etmemek üzere müte‘ahhid olduklarını sen ki Bostancıbaşı-i mûmâ-ileyhsin takr[î]r etmen ile takr[î]rin mûcebince ta‘ahhüd[ler]i Başmuhâsebe’ye kaydolunmağla imdi vech-i meşrûh üzere amel olunmak bâbında fermân-ı âlî-şânım sâdır olmuşdur buyurdum ki hükm-i şerîfim vardıkda bu bâbda sâdır olan emrim üzere amel edip dahi mârrü’z-zikr baratacı ustalarının fîmâ-ba‘d zikrolunduğu fiyât üzere işleyüp ziyâdeye füruht etmemek üzere ta‘ahhüdleri Hazîne-i âmire’m defterlerine sebt olunmağla şeref-yâfte-i sudûr olan işbu emr-i âlî-şânımın mazmûn-ı münîfi üzere amel olunup hilâfına rızâ ve cevâz göstermeyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sânî [min]-Safer li-sene erba‘a ve tis‘în ve miete ve elf. Be-makām-ı Kostantıniyye el-mahrûse.