İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 272 Hüküm no: 254 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul zimmî doğramacılar esnafı kethudalığına Petro v. Ogori’nin tayin edildiği Âsitâne-i aliyye’de vâki‘ zimmî doğramacılardan Arutin ve Simyon ve Mardiros ve Yorgi ve Agop ve Hıdır ve Ayan ve diğer Arutin ve diğer Arutin ve Yani ve Karabet ve Matos ve diğer Karebet ve Sefer ve diğer Yani ve sâirleri meclis-i şer‘-i şerîf-i enverde takrîr-i kelâm ve ta‘bîr ani’l-merâm edip kethudâmız olan ( ) zimmî hâlik olup yerine esnâfımızın umûrunu rü’yet ve idâreye kādir bir kimesne kethudâ nasb olunmak lâ-büd ve lâzım olduğundan esnâfımızın kudemâsından örf ve âdetimize vâkıf ve kemâ-yenbagī ahvâlimize ârif ve her vechile kethudâlık uhdesinden gelmeğe kādir olan işbu Petro v. Ogori zimmî esnâfımızın üzerine kethudâ nasb ve ta‘yîn olunması murâdımızdır deyü iltimâs [79a] eylediklerinde, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri dahi mesfûr Petro zimmîyi esnâf-ı mezbûr üzerine kethudâ nasb ve ta‘yîn ve hilâf-ı şer‘-i şerîf bir ferdi ta‘cîz ve tekdîr etmeyüp sadâkat ve istikāmet üzere umûrlarını idâre ve rü’yet etmek üzere tenbîh buyurduklarında, ol dahi hilâf-ı şer‘-i şerîf bir kimesneyi ve rencîde ve ta‘cîz etmeyüp sadâkat ve istikāmet üzere hizmete ta‘ahhüd etmeğin mâ-vaka‘a bi’t-taleb ketb olundu. Fî 5 min-Zilhicce sene [1]194. Şuhûdü’l-hâl: Kemahî İbrahim Çelebi, Mehmed Ağa b. Ahmed Kethudâ-yı muhzırân, İsmail Çelebi.