İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 273 Hüküm no: 255 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mehmed ile Mehmed b. Hüseyin’in beraber çalıştıkları Yemiş İskelesi’ndeki kuruyemişçi dükkânını birer sene nöbetle müstakil işletmek üzere sözleştikleri Mahmiye-i İstanbul’da Yemiş iskelesinde kara tarafında vâki‘ Molla Mahmud dükkânı demekle ma‘rûf kuruyemişçi dükkânı derûnunda mevcûde beyne’l-esnâf gedik ta‘bîr olunan âlât-ı lâzıme-i ma‘lûmenin nısf hisse-i şâyi‘asına mutasarrıf olan Ali Beşe b. Mehmed nâm kimesne meclis-i şer‘-i hatîr-i lâzımü’t-tevkīrde şerîki olup âlât-ı mezkûrenin nısf-ı âharına mutasarrıf olan bâ‘isü’l-kitâb el-Hâc Mehmed b. Hüseyin nâm kimesne mahzarında bi’t-tav‘i’s-sâf ikrâr-ı <> tâm ve takrîr-i kelâm edip müddet-i vâfireden berü zikrolunan dükkânda şerîkim mezbûr el-Hâc Mehmed ile ma‘an sâkin olup lâkin işbu târih-i hüccetden bir sene-i kâmile tamamına değin mezbûr el-Hâc Mehmed müstakillen sâkin olup sene hıtâmında mezbûr el-Hâc Mehmed çıkup dükkân-ı mezkûru bana teslîm, ben-dahi kezâlik bir sene-i kâmile zabt ve tasarruf edip bu vechile birer sene mühâyât tarîkıyle zabt ve tasarruf etmek üzere bi’t-terâzî ittifâk ve ittihâd ettik dedikde mezbûr el-Hâc Mehmed dahi şerîki mukırr-ı mezbûr Ali Beşe’yi kelimât-ı meşrûhasında tasdîk edip ve işbu târih-i hüccetden ba‘de’z-zabt ve’t-tasarruf senesi tamamında çıkup dükkân-ı mezkûrda olan âlât-ı merkūmeyi şerîki mezbûr Ali Beşe’ye def‘ ü teslîme ta‘ahhüd etmeğin mâ-vaka‘a bi’t-taleb ketb olundu. Fî-gurre-i Ramazan sene [11]94. Şuhûdü’l-hâl: Kethudâ el-Hâc Mustafa Ağa b. İbrahim, el-Hâc İbrahim b. Yusuf, Ali Ağa b. İbrahim, el-Hâc Veliyüddin, es-Seyyid Hasan b. Hüseyin, Mehmed Sâdık b. el-Hâc Mustafa. [Beyaz]