İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 276 Hüküm no: 257 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’un iki bin altı yüz doksan dokuz buçuk ve bir sülüs avârızhânesi olduğu ve 1194 senesi için hâne başına dört yüz yirmi dokuz akçe avârız vergisi tahsili fermânı Akzâ kuzâtü’l-Müslimîn evlâ vülâti’l-muvahhidîn ma‘denü’l-fâzıl [fazl] ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâ’i ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı ‒zîdet fezailehû‒ tevkī‘-i refî‘-i hümâyûn vâsıl olıcak ma‘lûm ola ki Hazîne-i âmire’m defterleri mûcebince İstanbul kazâsının iki bin altı yüz doksan dokuz buçuk ve bir sülüs avârız-hânesi olup bin yüz doksan dört senesine mahsûben cem‘ ve tahsîli lâzım gelmeğin ( ) der-uhde olunup yedine mühürlü ve nişânlu Mevkūfât defteri sûreti verilmekle mûcebince cem‘ ve tahsîl ettirilmek emrim olmuşdur buyurdum ki hükm-i şerîfimle mübâşir-i mezbûr vardukda bu bâbda sâdır olan emrim üzere amel edip dahi târih-i mezbûra mahsûben kazâ’-i mezbûrun ol mikdâr avârızhânesi olup Tersâne-i âmire’m ocaklığı olmağla beher hânesinden dörder yüz yirmi dokuz akçe mîrîleri irsâl olunan mühürlü ve nişânlu Mevkūfât defteri sûreti mûcebince vakit ve zamanıyla yerlü yerinden cem‘ ve tahsîl ve dâhil-i Tersâne-i âmire’m ettirtip hilâf-ı emr ü defter kimesneye ta‘allül ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşi’çün her bir avârızhânesinden onar akçe vech-i ma‘âş ve on beş akçe dahi Tersâne-i âmire’m içün aldırılup ve avârız içün alınan akçenin her yüz on akçesinden bir esedî guruş tahsîl olunup hîn-i tahsîlde mîrî’çün alınan akçeyi Hazîne-i âmire’me alındığı vech üzere aldırtup bundan ziyâde ve noksan alınmaya ve aldırmayasız kesr-i defterden ve noksan-ı hâneden ve fermânımdan ziyâde talebiyle zulm ve te‘addîden be-gāyet ihtirâz ve ictinâb eyleyesin şöyle bilesin alâmet-i şerîfime i‘timâd kılasın. Tahrîren [fi’]l-yevmi’s-sâlis [min]-Zilhicce li-sene selâse ve tis‘în ve miete ve elf. Be-makām-ı Kostantıniyye el-mahrûse. [Beyaz] [Beyaz] [Beyaz]