İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 46 Hüküm no: 5 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Kendiro v. Metri’nin kasab dükkanları gedik hisse ve aletlerinin oğulları Kika ve Sava tarafından Koca v. Nako’ya satıldığı Ma‘rûz Evkâf-ı hazret-i şehriyârîden Üçüncü Selhhâne’ye merbût olup mahrûse-i Galatasarayı kurbünde selhhâne civârında bir bâb ve saray-ı hümâyûn kurbünde bir bâb ve Fındıklı’da bir bâb ve Dörtyol ağzında bir bâb ve Karaköy Kapısı’nda bir bâb ve Beyoğlu’nda Ketomori mahallesinde bir bâb ve Ağa Câmii kurbünde bir bâb ve Yazıcı Câmii kurbünde bir bâb cem‘an sekiz bâb kasab dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmelerinden altışar sehm i‘tibârıyla birer sehimlerine mutasarrıf olan Kendiro v. Metri zimmî hâlik olup Kika ve Sava nâm zimmîler hâlik-i mesfûrun sulbî kebîr oğulları olduklarını kasab ustalarından Liko v. Preşkova ve Kiro v. Kiko nâm zimmîler ba‘de’l-ihbâr mersûm Kika kendiden asâleten ve karındaşı mesfûr Sava tarafından husûs-ı âtîde vekîl olduğu zimmiyân-ı mersûmân şehâdetleriyle sâbit olmağla vekâleten meclis-i şer‘de kasab ustalarından olup kasablık uhdesinden gelmeğe kādir idüği hâlâ Kasabbaşı Mehmed Emin Ağa tarafından vekîli Kassâbân Kethüdâsı el-Hâc Ali Ağa ve ustalarından Mehmed Said Ağa’nın ihbârlarıyla zâhir olan Koca v. Nako zimmî muvâcehesinde takrîr-i kelâm edip ber vech-i muharrer babamız hâlik-i mesfûrdan benim ile karındaşım müvekkil-i mesfûra intikâl eden dekâkîn-i mezkûre âlât-ı lâzımelerinde olan südüs hisse-i şâyi‘amızı hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mesfûr Koca zimmîye asâleten ve vekâleten ferâgat ve kasr-ı yed edip âlât-ı mezkûrenin südüs hisselerinde benim ve karındaşım müvekkîl-i mesfûrun kat‘an alâkamız kalmayıp mesfûr Koca zimmînin hakk-ı mufavvazı olmuşdur dedikde mesfûr Koca zimmî dahî ba‘de’t-tasdîk dekâkîn-i mezkûre gediklerinin südüs sehimleri hâlik-i mesfûr[a] intikâlinden oğulları mersûmân Lika ve Sava üzerlerine anların dahî ferâğ ve kasr-ı yedlerinden mersûm Koca zimmî üzerine defter-i vakfa ba‘de’l-kayd yedine cânib-i vakfdan temessük i‘tâ olunmak niyâzında oldukları huzûr-ı âlîlerine i‘lâm olundu. Fî selh-i Zilhicceti’ş-şerîfe sene 1201 Derkenar: Mübâya‘a-i kasab