İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 47 Hüküm no: 6 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiro v. Kika, Liko v. Preşkova ve Kosta v. Preşkova’nın kasab dükkanlarındaki gedik hisse ve aletlerini Koca v. Nako’ya sattığı Ma‘rûz Evkâf-ı hazret-i şehriyârîden Üçüncü Selhhâne’ye merbût olup mahrûse-i Galata’da saray-ı hümâyûn kurbünde selhhâne civârında bir bâb ve saray-ı hümâyûn kurbünde bir bâb ve Fındıklı’da bir bâb, Dörtyol ağzında bir bâb ve Karaköy Kapısı’nda bir bâb ve Ağa Câmii kurbünde bir bâb ve Yazıcı Câmii kurbünde bir bâb ve Beyoğlu’nda bir bâb cem‘an sekiz bâb kasab dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmeleri altışar sehm i‘tibârıyla birer sehmlerine mutasarrıf olan Kiro v. Kika ve birer sehmlerine mutasarrıf olan Liko v. Preşkova ve birer sehmlerine dahî kezâlik mutasarrıf olan Kosta v. Preşkova nâm üç nefer zimmîlerden her biri meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kassâbân Kethüdâsı el-Hâc Ali Ağa hâzır olduğu hâlde kasab tâ’ifesinden olup kasab ustalığı uhdesinden gelmeğe kādir idüği kethüdâ-yı mezbûr el-Hâc Ali Ağa ile ustalarından Mehmed Said Ağa’nın ihbârlarıyla zâhir olan Koca v. Nako zimmî muvâcehesinde takrîr-i kelâm edip ber vech-i muharrer dekâkîn-i mezkûre gediklerinde her birimizin südüs hisse-i âlât-ı lâzıme-i ma‘lûmelerimizi hüsn-ı rızâ ve ihtiyârımız ile bedel-i ma‘lûm mukâbelesinde bâ-ma‘rifet-i mütevellî mersûm Koca zimmîye ferâgat ve kasr-ı yed edip fîmâ ba‘d âlât-ı mezkûrede bizim kat‘â alâka ve medhalimiz kalmayıp mersûm Koca zimmînin hakk-ı mufavvazı olmuşdur dedikde mersûm Koca zimmî dahî ba‘de’t-tasdîk dekâkîn-i mezkûrenin âlât-ı mezkûrelerinden üç südüs sehmleri mersûmûnun ferağlarından mersûm Koca zimmî üzerine defter-i vakfa kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî selh-i Zilhicce sene 1201. Derkenar: Mübâya‘a-i kasab