İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 48 Hüküm no: 7 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Koço v. Ostoyo’nun kasab dükkanı gedik hisse ve aletlerinin oğulları Nikola ve Petro tarafından Koca v. Nako’ya satıldığı Ma‘rûz Evkâf-ı hazret-i şehriyârîden Üçüncü Selhhâne’ye merbût olup mahrûse-i Galatasarayı kurbünde selhhâne civârında bir bâb ve saray-ı hümâyûn kurbünde bir bâb ve Fındıklı’da bir bâb ve Dörtyol ağzında bir bâb ve Karaköy Kapısı’nda bir bâb ve Beyoğlu’nda Ketemori mahallesinde bir bâb ve Ağa Câmii kurbünde bir bâb [2b] ve Yazıcı Câmii kurbünde bir bâb cem‘an sekiz bâb kasab dükkânları derûnlarında mevcûd beyne’l-hıref gedik ta‘bîr olunur âlât-ı lâzıme-i ma‘lûmelerinden altışar sehm i‘tibârıyla ikişer sehmlerine mutasarrıf olan Koço v. Ostoyo zimmî hâlik Nikola ve Petro zimmîler hâlik-i mesfûrun sulbî kebîr oğulları olduklarına kasab ustalarından Liko v. Preşkova ve Kiro v. Kiko zimmîler ba‘de’l-ihbâr mersûm Nikola husûs-ı âtîde kendiden asâleten ve karındaşı mesfûr Petro tarafından vekîl olduğu zimmîyân-ı mesfûrân şehâdetleriyle sâbit olmağla vekâleten meclis-i şer‘de kasab ustalarından olup kasablık uhdesinden gelmeğe kādir idüği hâlâ Kasabbaşı Mehmed Emin Ağa tarafından vekîli Kassâbân Kethüdâsı el-Hâc Ali Ağa ve ustalarından Mehmed Said Ağa’nın ihbârlarıyla zâhir olan Koca v. Nako zimmî muvâcehesinde takrîr-i kelâm idüp ve ber-vech-i muharrer babamız hâlik-i mesfûrdan benim ile karındaşım müvekkil-i mesfûra intikâl eden dekâkîn-i mezkûre gedikleri olan âlât-ı lâzıme-i ma‘lûmelerinde iki südüs hisse-i şâyi‘amızı hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde asâleten ve vekâleten mesfûr Koca zimmîye ferâgat ve kasr-ı yed edip sehmeyn-i mezkûreynde benim ve karındaşım müvekkil-i mersûmun kat‘â alâkamız kalmayıp mesfûr Koca zimmînin hakk-ı mufavvazı olmuşdur dedikde mesfûr Koca zimmî dahî ba‘de’t-tasdîk dekâkîn-i mezkûre gediklerinin iki südüs sehimleri hâlik-i mesfûr intikâlinden oğulları mersûmân Nikola ve Petro üzerlerine anların dahî ferâğ ve kasr-ı yedlerinden mesfûr Koca zimmî üzerine defter-i vakfa ba‘de’l-kayd yedine cânib-i vakfdan temessük i‘tâ olunması niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî selh-i Zilhicceti’ş-şerîfe sene 1201. Derkenar: Mübâya‘a-i kasab