İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 49 Hüküm no: 8 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komyanos v. İsterati’nin, Kürkçü Yorgi v. Sava’ya için inşa ettiği evden olan alacağını tahsil ettiği Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel İkinci Kâtib Ahmed Efendi hâssa mi‘mârı hulefâsından es-Seyyid İsmail Hâfız Mehmed Emin Halîfeler ile İstanbul’da Ayvansarayı Kapısı dâhilinde Mustafa Paşa mahallesinde Lonca nâm mahalde vâki‘ derûn-ı arzuhâlde mastûrü’l-ism Kürkçü Yorgi v. Sava’nın menziline varıp huzûr-ı müslimînde ba‘dehû akdi’l-meclis neccâr kalfalarından sâhib-i arzuhâl Komyanos v. İstirati nâm zimmî tarafından ber-vech-i âtî sulh ve ibrâya vekîl olduğu es-Seyyid İsmail Ağa b. el-Hâc Mustafa ile İstirati v. Sava nâm zimmî şehâdetleriyle sâbit olan Luko v. Dimitri nâm zimmî meclis-i ma‘kûd-ı mezkûrda mersûm Yorgi zimmî muvâcehesinde müvekkilim mesfûr târîh-i i‘lâmdan bir sene mukaddem işbu akd-i meclis olunan menzilin harâb ebniyesini hedm ve enkâzıyla zirâ‘ı on dörder buçuk guruş hesâbıyla müceddeden bir bâb menzil binâ etmek üzre mersûm Yorgi zimmî ile mukâvele ettikden sonra atîk ebniyeyi hedm ve müceddeden ulyâ ve vustâda üç oda ve bir matbah odası süflâda matbah ve müştemilât-ı sâ’ireyi bir bâb menzil binâ ve tekmîl etmekle menzil-i mezkûra müvekkilim mesfûrun masrûfâtı olan iki bin dokuz yüz guruşun iki bin yüz elli guruşunu teslîm edip bâkî kalan yedi yüz elli guruşu hâlâ zimmetinde olmağla bi’l-vekâle taleb ederim deyü tasaddî eylediği da‘vâsından bâ-vesâtat-ı muslıhîn mersûm Yorgi zimmî ile bi’l-vekâle üç yüz guruşa sulh oldukda ol dahî sulh-ı mezkûru ba‘de’l-kabûl bedel-i sulh-ı mezkûr üç yüz guruşu mersûm Yorgi zimmî yedinden bi’l-vekâle ahz u kabz edip menzil-i mezkûrun bi’l-cümle ebniyesine ve târîh-i i‘lâna gelince cemî‘ hukûk-ı şer‘iyyeye müte‘allika âmme-i da‘vâdan her biri âharın zimmetini bi’l-asâle ve bi’l-vekâle ibrâ ve iskât ve her biri ber vech-i muharrer âharın ibrâsını ba‘de’l-kabûl eğer ba‘de zamânin müvekkil-i mersûm husûs-ı mezkûru mersûm Yorgi zimmîden taleb ve da‘vâ ve şer‘an bir nesne ahz ederse me’hûzuna es-Seyyid İsmail Ağa nâm kimesne kefîl ve zâmin olduğunu mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a inhâ eyledikleri İstanbul Mahkemesi’nden huzûr-ı âlîlerine i‘lâm olundu. Fî 29 min Zilhicce sene 1201. Derkenar: Keşf