İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 50 Hüküm no: 9 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayram v. Manas’ın, Avanes v. Artin’e tehditle sattığı değirmen davasında anlaştıkları Uncu esnâfından arzuhâl eden Ayram v. Manas nâm zimmî meclis-i şer‘-i kavîmden uncular ve etmekçiler kethüdâsı Mustafa Ağa ve diğer Mustafa Ağa ve nizâm ustaları hâzırûn oldukları hâlde İstanbul’da Haseki Çarşısı’nda vâki‘ üç horoslu bir bâb uncu değirmeni gediğine mutasarrıf olan derûn-ı arzuhâlde mezkûrü’l-ism Avanes v. Artin [3a] zimmî muvâcehesinde takrîr-i kelâm edip değirmen-i mezkûr derûnunda mevcûd beyne’l-esnâf gedik ta‘bîr olunur on iki re’s bargir ve âlât-ı sâ’ire-i ma‘lûme benim mülküm olup bin yüz doksan iki senesi Muharremi’nde gedik-i mezkûru dört bin sekiz yüz guruşa iştirâya tâlib-i âhar var iken bundan akdem menfiyyen vefât eden Etmekçi el-Hâc Ahmed Ağa ve Uncu Said Ağa’dan her biri târîh-i mezkûrda gedik-i mezkûru mersûm Avanes zimmiye bin iki yüz guruşa bey‘ ve teslîm eyle deyü benî ihâfa ve ikrâh etmeleriyle ben dahî gedik-i mezkûru bin iki yüz guruşa mersûm Avanes zimmîye mukrehan bey‘ ve teslîm etmemle meblağ-ı mezkûr bin iki yüz guruşu yedinden ahz ve gedik-i mezkûru bana red ve teslîme mersûm Avanes zimmîye tenbîh olunmak murâdımdır deyü tasaddî eylediği da‘vâsından bâ-vesâtat-ı muslıhîn yüz guruş bedel-i makbûza ba‘de’s-sulh ve’l-kabûl müdde‘î-i mersûm değirmen-i mezkûr gediğine ve oda takımına müte‘allika âmme-i da‘vâdan mersûm Avanes zimmînin zimmetini ibrâ-i âmm ile ibrâ ve iskât eyledikde ol dahî ibrâ-i mezkûrîni kabûl ve bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 4 min Muharrem sene 1202.