İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 50 Hüküm no: 10 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihayil v. Serkiz’in, ölen Ekmekçi Mardiros’a istemeyerek sattığını söylediği değirmen hissesine ait davanın reddedildiği Ma‘rûz Uncu esnâfından arzuhâl eden Mihayil v. Serkiz nâm zimmî meclis-i şer‘-i kavîmde uncular kethüdâsı Mustafa Ağa ve etmekçiler kethüdâsı diğer Mustafa Ağa ve nizâm ustaları hâzırûn oldukları hâlde bundan akdem menfiyyen Mavsa’da? hâlik olan Etmekçi Mardiros v. Sekyas zimmînin evlâd-ı sığârı Artin ve Kigork ve Yerab nâm Nasrâniye’nin bâ-hüccet-i şer‘iyye vasî-i mansûbeleri olup ve hâlik-i mesfûrun zevce-i metrûkesi Yerobsima Nasrâniye’nin babası ve husûs-ı âtîde tarafından vekîl olduğu şahsını ârifân Eskiya v. Norsez ve Ohan v. Bedros zimmîler şehâdetleriyle sâbit olan Avanes v. Serkiz zimmî muvâcehesinde takrîr-i kelâm edip İstanbul’da Sarıgez’de vâki‘ bir bâb francalacı fırını ve ana merbût ittisâlinde kâ’in otuz altı sehm i‘tibârıyla dokuz horosu müştemil bir bâb uncu değirmeni derûnlarında mevcûd beyne’l-esnâf gedik ta‘bîr olunur âlât-ı lâzıme-i ma‘lûmeden dokuz re’s bargir ve bargir-i mezkûrlara isâbet eden sâ’ir âlât-ı lâzıme-i ma‘lûmeleri benim mülk ve tasarrufumda olup hisse-i mezkûremden beş re’s bargir ve altı aded mıh ve ana isâbet eden âlât-ı ma‘lûmenin kıymeti iki bin guruşdan ezyed olup ve derûnunda bin beş yüz guruş sermâyem ve dokuz aylık hesâbım var iken bin yüz doksan sekiz senesi Cumâde’l-ûlâsı’nın on beşinci günü Kanlı Fırın etmekçisi müteveffâ el-Hâc Ahmed Ağa ve Uncu Said Ağa’dan her biri sâlifü’z-zikr beş re’s bargir ve altı mıh ve ana isâbet eden sâ’ir gedik âlâtını mesfûr Mardiros zimmîye huzûr-ı hâkimde dokuz yüz guruşa bey‘ ve teslîm ve ber-vech-i âtî zimmetini ibrâ eyle deyü beni ihâfe ve ikrâh etmeleriyle ben dahî havfımdan nâşî vasî-i mersûmun yedinde olan mübâya‘a ve ibrâ hücceti nâtıka olduğu üzere târîh-i mezkûrda İstanbul Kadısı Mustafa Beyefendi Hazretleri huzûrlarında hisse-i mezkûremi noksan kıymetiyle dokuz yüz guruşa hâlik-i mesfûr Mardiros zimmîye hayâtında bey‘ ve teslîm ve mebî‘-i mezkûrun ta‘zîr ve gabnına ve gedik husûsuna ve husûs-ı şirkete ve târîh-i hüccete gelince beynimizde ceryân eden sâ’ir ahz u i‘tâ ve mu‘âmelât-ı şettâya müte‘allika âmme-i de‘âvî ve kâffe-i mutâlebâtdan hâlik-i mesfûr Mardiros zimmînin zimmetini ibrâ’-i âmm ile ba‘de’l-ibrâ ve’l-kabûl üç gün mürûrunda semeni olan meblağ-ı mezkûr dokuz yüz guruşu bilâ ikrâh ihtiyârımla mesfûr Mardiros zimmî yedinden tamâmen ahz u kabz etmişidim lâkin ber vech-i muharrer ikrâh ile olan bey‘ ve ibrâ-i mezkûr gayr-ı sahîh olmağla meblağ-ı mezkûr dokuz yüz guruşu yedimden ahz birle hisse-i mezkûremi bana red ve teslîme ve sermâyem olan bin beş yüz guruş ile ber minvâl-i muharrer dokuz aylık hesâb şirketim rü’yet olunup zimmetinde zuhûr eden hakkımı tereke-i hâlik-i mesfûrdan bana edâya vasî-i mersûm Avanes zimmîye tenbîh olunmak murâdımdır deyü da‘vâya tasaddî edip lâkin mezbûrân Etmekçi el-Hâc Ahmed Ağa ve Uncu Said Ağa’dan her biri henüz erbâb-ı ikrâhdan olmadıklarından mâ‘adâ takrîr-i meşrûhu üzere ba‘de’l-yevm âhar mahalde bi’l-ihtiyâr [3b] kabz-ı semen ile bey‘-i mezkûru mücîz olmağla da‘vâ-yı mezkûresi meşrû‘a ve mu‘tebere olmamağın müdde‘î-i mesfûrun da‘vâ-yı mezkûresine iltifât olunmayıp bi-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 4 Muharremü’l-harâm sene 1202.