İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 52 Hüküm no: 11 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in kasab dükkanındaki gedik hissesi ve aletlerini ortağı Ahmed b. Ali’ye sattığı Evkâf-ı hazret-i şehriyârîden Dokuzuncu Selhhâne’ye merbût olup medîne-i Üsküdar’da Atbazarı kurbünde sebzeci dükkânına muttasıl bir bâb kasab dükkânı derûnunda mevcûd beyne’l-esnâf gedik ta‘bîr olunur âlât-ı lâzıme-i ma‘lûmenin bâ-temessük-ı mütevellî nısf-ı şâyi‘alarına mutasarrıf olan Hüseyin b. Mehmed nâm kimesne meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kassâbân Kethüdâsı el-Hâc Ali Ağa ve ustalarından el-Hâc Osman Ağa ve Hüseyin Beşe hâzırûn oldukları hâlde âlât-ı mezkûrenin nısf-ı şâyi‘-i âharının mutasarrıfı Ahmed b. Ali muvâcehesinde takrîr-i kelâm edip mutasarrıf olduğum âlât-ı mezkûreden nısf-i hisse-i şâyi‘amı hüsn-ı rızâ ve ihtiyârım ile bedel-i ma‘lûm mukâbelesinde bâ-ma‘rifet-i mütevellî şerîkim mezbûr Ahmed’e ferâgat ve kasr-ı yed eylediğimde ol dahî kabûl edip fîmâ ba‘d âlât-ı mezkûrede benim kat‘â alâka ve medhalim kalmayıp mecmû‘ı mezbûr Ahmed’in hakk-ı mufavvazı olmuşdur dedikde ol dahî ba‘de’t-tasdîk nısf âlât-ı mezkûre dahî mezbûr Hüseyin ferâğından mezbûr Ahmed üzerine defter-i vakfa kayd birle cânib-i vakfdan yedine temessük i‘tâ olunması ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 13 Muharremü’l-harâm sene 1202