İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 52 Hüküm no: 12 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Halil b. Ebubekir’in iki kasab dükkanındaki gedik hisse ve aletlerini es-Seyyid Ahmed Ağa’ya sattığı Ma‘rûz Evkâf-ı hazret-i şehriyârîden Beşinci Selhhâne’ye merbût olup medîne-i Üsküdar’da Yeniçeşme’de vâki‘ bir bâb ve yine medîne-i mezbûrede Eskihamâm kurbünde kâ’in bir bâb cem‘an iki bâb kasab dükkânları derûnlarında mevcûd beyne’l-hıref gedik ta‘bîr olunur âlât-ı lâzıme-i ma‘lûmelerin bâ-temessükât-ı mütevellî mutasarrıfları olan es-Seyyid Halil b. Ebubekir meclis-i şer‘-i münîrde kasab tâ’ifesinden olup kasab ustalığı uhdesinden gelmeğe kādir idüği hâlâ Kasabbaşı Mehmed Emin Ağa tarafından vekîli kethüdâsı Kassâbân el-Hâc Ali Ağa ve ustalarından el-Hâc Osman Ağa ve Hüseyin Usta ihbârlarıyla zâhir olan es-Seyyid Ahmed Ağa b. Veliyyüddin muvâcehesinde takrîr-i kelâm edip ber-vech-i muharrer iki bâb dükkânlar derûnlarında mevcûd mutasarrıf olduğum âlât-ı lâzıme-i mezkûreleri hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mezbûr es-Seyyid Ahmed Ağa’ya ferâgat ve kasr-ı yed edip ol dahî ba‘de’l-kabûl dükkaneyn-i mezkûreyn derûnlarında mevcûd olan âlât-ı mezkûrede benim kat‘â alâka ve medhalim kalmayıp mezbûr es-Seyyid Ahmed Ağa’nın hakk-ı mufavvazı olmuşdur dedikde ol dahî ba‘de’t-tasdîk dükkâneyn-i mezkûreynin âlât-ı lâzıme-i ma‘lûmeleri merkûm es-Seyyid Halil’in kasr-ı yedinden mezbûr es-Seyyid Ahmed Ağa üzerine defter-i vakfa kayd birle taraf-ı vakfdan yedine başka başka temessük i‘tâ olunması ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 13 Muharremü’l-harâm sene 1202.