İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 53 Hüküm no: 13 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal İsteryo’nun, Doco v. Yovan’a sattığı bakkal malı için Kuyumcu Nikola’dan kefaleti sebebiyle alacağını talep ettiği Ma‘rûz Sâdır olan fermân-ı âlîlerine imtisâlen Bakkâl İsteryo v. Dimitri nâm zimmî Çarşamba günü dîvân-ı âlîlerinde ba‘dehû du‘âhânemizde ma‘kûd meclis-i şer‘-i kavîmde arzuhâl eden Kuyumcu Nikola v. Misayil zimmî ile terâfu‘larında mesfûrun kayınatası Bakkâl Doco v. Yovan zimmî bin iki yüz senesi Recebi’nin sekizinci günü İstanbul’da Avratpazarı’nda vâki‘ bakkâl dükkânına nakl ve iskân olunduğunda bakkâl metâ‘ı olup yedimden iştirâ ve kabz eylediği envâ‘-ı zeyâhir-i ma‘lûme semenlerinden zimmetinde hakkım olan yüz altmış bin akçenin edâsına tarafeynden bi’l-emr ve’l-kabûl dâmâdı mesfûr Nikola ile gâ’ibân ani’l-meclis Hristo ve Marko zimmîler ma‘an kefîl ve zâmin olduklarından sonra mesfûr Doco zimmî deyn-i mezkûreyni bana kable’l-edâ ikrâr etmekle bakkâl ustaları ve mesfûr Nikola ma‘rifetleriyle dükkânında mevcûde eşyâsından meblağ-ı mezkûrun on üç bin akçesini ahz ve istîfâ edip zimmetinde yüz kırk yedi bin akçe hakkım bâkî kalmağla mesfûrûnun ber vech-i muharrer kefâletlerine binâ’en meblağ-ı bâkî-i mezkûrdan mersûm Nikola zimmîye isâbet eden kırk dokuz bin akçeyi mesfûr Nikola’dan taleb ederim deyü ba‘de’d-da‘vâ ve’l-istintâk mesfûr Nikola cevâbında kayınatam mesfûrun yalnız Aleksi nâm zimmîye altmış bin akçe deynine mesfûran ile ben ma‘an kefîl olmuşidim [40a] deyü müdde‘î-i mersûmun ber-vech-i muharrer yüz altmış bin akçe hakkı olduğunu ve kefâlet-i mezkûreyi külliyen inkâr edicek müdde‘î-i mersûm ber-vech-i muharrer müdde‘âsını lede’t-tezkiye makbûlü’ş-şehâde oldukları zâhir olan Bakkâl Yorgaki v. Kosta ve diğer Yorgaki v. Dimitri nâm zimmîler şehâdetleriyle mesfûr Nikola zimmî muvâcehesinde vech-i şer‘î üzere isbât etmeğin mûcebiyle ba‘de’l-hükm meblağ-ı bâkî-i mezkûrdan mesfûr Nikola zimmîye isâbet eden kırk dokuz bin akçe müdde‘î-i mersûma edâya mesfûr Nikola zimmîye şer‘an tenbîh olunduğu huzûr-ı âlîlerine i‘lâm olundu. Fî 13 Muharremü’l-harâm sene 1202.