İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 55 Hüküm no: 15 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardiros ve Avanes çizmeci dükkanı açabilmeleri için mahlul tezgah bulunması gerektiği Ma‘rûz Arzuhâl eden Mardiros v. Kigork ve Avanes v. Karabet nâm zimmîler meclis-i şer‘-i münîrde ve Dikicibaşı es-Seyyid Osman Ağa ve Çizmecibaşı el-Hâc İbrahim Ağa ve Yiğitbaşı Mehmed Usta ve zimmiyân Yiğitbaşısı Bedros ve köşe ustalarından Melkon ve Adavik ve Avanes vesâ’irleri muvâcehelerinde bizler çizmeci tâ’ifesi kalfalarından ve san‘at-ı mezbûrede pîr perver olmamızla usta olmak üzre bizlere birer destgâh ta‘yîn olunmak matlûbumuzdur dediklerinde mezbûrûn dikicibaşı vesâ’irleri dahî cevâblarında fi’l-hakîka mersûmân Mardiros ve Avanes zimmîler san‘at-ı mezbûrede pîr perver olduklarını ikrâr [lâkin] lâkin işbu yedimizde olan bir kıt‘a hüccet-i şer‘iyye mantûkunca çizmeci tâ’ifesinin ehl-i zimmet olanları ez-kadîm yirmi aded destgâh ashâbına mahsûs olup ziyâde olmamağla cümlemizin ma‘rifetiyle mersûmân Mardiros ve Avanes zimmîler mârrü’z-zikr yirmi aded destgâh ashâbı zimmîlere mülâzım olup içlerinden birinin destgâhı mahlûl oldukda mesfûrân Mardiros ve Avanes zimmîlere verilip âhara verilmemek üzre ta‘ahhüd ve iltizâm eyledik dediklerinde anlar dahî hüccet-i mezkûreyi tasdîk ve mülâzım olmağa râzılar olup bu vech üzere ahd-i visâk ve kavl u ittifâk eyledikleri başmuhâsebeye kayd ve yedlerine tuğrâ-yı garrâ ile mu‘anven emr-i âlîşân i‘tâ buyurulmak ricâsında oldukları huzûr-ı âlîlerine i‘lâm olundu. Fî 14 Muharremü’l-harâm sene 1202.