İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 55 Hüküm no: 16 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nako ve Metro’nun, babaları Keriso v. Londo’dan intikal eden kasab gedik hisse ve aletlerini İstoyan v. Petro’ya sattıkları Ma‘rûz Evkâf-ı hazret-i şehriyârîden Sekizinci Selhâne’ye merbût olup İstanbul’da Samatya kurbünde Merhaba Köşesi’nde vâki‘ bir bâb kasab dükkânı ile Yedinci Selhhâne’ye merbût Hocapaşa’da Sebil karşısında vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin nısf hisse-i şâyi‘alarının bâ-temessük-ı mütevellî mutasarrıf iken hâlik olan Keriso v. Londo’nun sulbî kebîr oğulları oldukları kasab ustalarından Moçi v. Yenaki ve Nako v. Yapakosta ve Keriçe v. Panayot nâm zimmîler ihtiyârlarıyla zâhir olan Nako ve Metro nâm zimmîler meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa hâzır olduğu hâlde İstoyan v. Petro nâm zimmî muvâcehesinde her biri takrîr-i kelâm edip zikirleri mürûr eden iki bâb dükkânlar derûnlarında mevcûde âlât-ı mezkûreden babamız hâlik-i mersûmun hayâtında tasarrufunda olup ba‘de helâkihî hasbe’l-âde bize intikâl eden nısf hisselerimizi hüsn-ı rızâ ve ihtiyârımız ile bâ-re’y-i mütevellî bedel-i ma‘lûm mukâbelesinde mesfûr İstoyan zimmîye ferâgat ve kasr-ı yed eylediğimizde ol dahî kabûl edip fîmâ ba‘d sâlifü’l-beyân iki bâb dükkânlar derûnlarında olan âlât-ı mezkûrelerin nısflarında bizim kat‘â alâka ve medhalimiz kalmayıp mesfûr İstoyan zimmînin hakk-ı mufavvazı olmuşdur dedikde ol dahî ba‘de’t-tasdîk âlât-ı mezkûrelerin nısfları hâlik-i mersûm intikâlinden oğulları mersûmân üzerlerine anların dahî ferâğlarından mesfûr İstoyan zimmî üzerine defter-i vakfa kayd birle yedine temessük i‘tâ olunması ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 20 M. sene 1202.