İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 56 Hüküm no: 17 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Usta b. Abdullah’ın kasab gedik hisse ve aletlerini Mehmed Emin Usta’ya sattığı Ma‘rûz Evkâf-ı Hazret-i Ebâ Eyyûbe’l-ensârî -radiyallâhu anhu Rabbihi’l-Bârî’den- Eğrikapı hâricinde Dördüncü Selhhâne’ye merbût olup Ayvansaray Kapısı hâricinde ve mukâbilinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin bâ-temessük-ı mütevellî mutasarrıfı Abdi Usta b. Abdullah meclis-i şer‘-i kavîmde hâlâ Kasabbaşı Mehmed Emin Ağa tarafından vekîli medîne-i Eyüb Kassâbânı Kethüdâsı Ebubekir Ağa ve ustalarından Mehmed Said Usta ve es-Seyyid Mehmed Usta hâzırûn oldukları hâlde yine kasab ustalarından Haseki oğlu Mehmed Emin Usta muvâcehesinde takrîr-i kelâm edip mutasarrıf olduğum âlât-ı lâzıme-i ma‘lûmemi hüsn-ı rızâ ve ihtiyârım ile bâ-re’y-i mütevellî bedel-i ma‘lûm mukâbelesinde merkûm Mehmed Emin Usta’ya ferâgat ve kasr-ı yed eylediğimde ol dahî kabûl edip âlât-ı mezkûrede benim kat‘â alâka ve medhalim kalmayıp mezbûrun [5a] hakk-ı mufavvazı olmuşdur dedikde ol dahî ba‘de’t-tasdîk âlât defter-i vakfa mezbûr Mehmed Emin Usta üzerine kayd birle yedine temessük i‘tâ olunması ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 20 M. sene 1202.