İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 57 Hüküm no: 18 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yani’nin kasap gedik hisse ve aletlerini Yani v. Niço’ya sattığı Ma‘rûz Evkâf-ı hazret-i şehriyârîden Dokuzuncu Selhhâne’ye merbût olup medîne-i Üsküdar’da Küçükhamâm kurbünde Peçeci dükkânına muttasıl bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin rub‘una bâ-temessük-ı mütevellî mutasarrıf olan Nikola v. Yani nâm zimmî meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa hâzır olduğu hâlde kasab ustalarından olup âlât-ı mezkûrenin rub‘-ı âharına mutasarrıf olan Yani v. Niço zimmî muvâcehesinde takrîr-i kelâm edip mutasarrıf olduğum rub‘ hisse-i mezkûremi bâ-re’y-i mütevellî bedel-i ma‘lûm mukâbelesinde hüsn-ı rızâ ve ihtiyârımla rub‘-ı âharına mutasarrıf olan mersûm Yani zimmîye ferâgat ve kasr-ı yed edip ol dahî kabûl etmeğin fîmâ ba‘d âlât-ı mezkûrede benim kat‘â alâka ve medhalim kalmayıp mersûm Yani zimmînin hakk-ı mufavvazı olmuşdur dedikde mersûm Yani zimmî dahî ba‘de’l-kabûl rub‘ âlât-ı mezkûre mesfûr Nikola ferâgından mersûm Yani zimmî üzerine defter-i vakfa kayd birle yedine temessük i‘tâ olunması ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 30 M. sene 1202.