İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 57 Hüküm no: 19 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Odabaşı’nın, Kasab Osman’dan koyun etinden olan alacağını talep ettiği Ma‘rûz Sâhib-i arzuhâl kasab ustalarından Osman b. el-Hâc Mehmed nâm kimesne meclis-i şer‘-i münîrde derûn-ı arzuhâlde mezkûrü’l-ism Mehmed Odabaşı b. Hüseyin nâm kimesne muvâcehesinde Kasabbaşı Ağa Çukadârı Osman Ağa ve Kasablar tebdîli Mustafa Ağa hâzır oldukları hâlde mezbûr Mehmed Odabaşı müddet-i vâfireden berû İstanbul’da Büyük Karaman’da vâki‘ bir bâb kasab dükkânımda kandâr ve beyâ‘ım olup müddet-i mezkûrede yedimden ahz ve âhara bey‘ ve kabz-ı semen eylediği lahm-ı ganemin hesâbını mezbûr Mehmed Odabaşı ile huzûr-ı müslimînde hesâb-ı sahîh ile rü’yet eylediğimizde cihet-i mezbûreden zimmetinde bin beş yüz altmış iki buçuk guruş alacak hakkım zâhir ve meblağ-ı mezkûr zimmetinde bana deyni olduğunu kat‘iyyen ikrâr dahî etmişidi ba‘dehû mezbûr Mehmed Odabaşı meblağ-ı mezkûrun altı yüz kırk iki guruşu ile beni Şehrî Efendi nâm kimesne üzerine havâle-i sahîha ile havâle ve her birimiz havâle-i mezkûreyi kabûl edip bâkî dokuz yüz yirmi buçuk guruşu hâlâ zimmetinde olmağla meblağ-ı bâkî-i mezkûru ve mezbûr Mehmed Odabaşı’ndan taleb ederim deyü da‘vâ ol dahî müddet-i vâfireden berû dükkân-ı mezkûrda müdde‘î-i mezbûrun kandâr ve beyâ‘ı olduğunu ikrâr lâkin cihet-i mezkûreden müdde‘î-i mezkûreden müdde‘î-i mezbûre ancak bin iki yüz guruş deynim olup havâle olunan meblağ-ı mezbûr altı yüz kırk iki guruş meblağ-ı mezbûrda firu-nihâde kılındıkdan sonra zimmetimde ancak beş yüz elli sekiz guruş deynim bâkî kaldı deyüp müdde‘î-i mezbûrun ziyâde müdde‘âsını inkâr eyledikde müdde‘î-i mezbûr ber-vech-i muharrer ziyâde müdde‘âsını lede’t-tezkiye adâletleri zâhir olan Ebubekir b. el-Hâc Mustafa ve el-Hâc İbrahim b. Süleyman nâm kimesneler şehâdetleriyle mezbûr Mehmed Odabaşı muvâcehesinde vech-i şer‘î üzere isbât etmeğin mûcebince meblağ-ı bâkî-i mezkûr dokuz yüz yirmi buçuk guruşu müdde‘î-i mezbûr Kasab Osman’a edâ ve teslîme mezbûr Mehmed Odabaşı’ya tenbîh olunduğu tescîl ve ba‘dehû mübâşir ta‘yîn olunan Yazıcı Mehmed Efendi yediyle huzûr-ı âlîlerine i‘lâm olundu. Fî 14 Muharremü’l-harâm sene 1202.