İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 60 Hüküm no: 22 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. Serkiz’in tütüncü dükkanı gedik hisse ve aletlerini Duhânî Kirkor v. Manya’ya sattığı Ma‘rûz Ma‘den kaleminde mukayyed gediklerden olup Ayasofya-i Kebîr kurbünde Arslanhâne ittisâlinde kâ’in bir bâb tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mutasarrıfı duhancı esnâfından arzuhâl eden Avanes v. Serkiz nâm zimmî meclis-i şer‘-i münîrde duhancı esnâfının kethüdâları İbrahim Ağa b. Ahmed ve Yiğitbaşı es-Seyyid Mehmed b. Yusuf hâzırân oldukları hâlde mutasarrıf olduğu âlât-ı lâzıme-i mezkûresini kethüdâ ve ustaları ma‘rifetleriyle Duhânî Kirkor v. Manya zimmîye elli guruş semen-i makbûza bey‘ ve temlîk ve teslîm eylediğinde ol dahî ber-vech-i muharrer iştirâ ve temellük ve kabûl eyledikden sonra müşterî-i merkûm Kirkor zimmî takrîr-i kelâm edip dükkân-ı mezkûr mutasarrıfı Ali Efendi’ye lüzûmu olup dükkân-ı mezkûrdan beni ihrâc irâdesiyle ta‘cîz etmeğin şurût-ı mer‘iyyemiz üzere iştirâ eylediğim âlât-ı mezkûreyi Mahmudpaşa kurbünde Parmakkapı ittisâlinde vâki‘ müşâhereten müste’cîri olduğum bir bâb dükkâna nakl ve ber-vech-i muharrer kalemine kayd olunmak murâdımdır dedikde bu misillü âhar mahalle gedik nakli şurût-ı meriyyelerinden olduğunu kethüdâ ve yiğitbaşı mezbûrân haber vermeleriyle mârrü’z-zikr Arslanhâne ittisâlinde olan dükkân gediği Mahmudpaşa kurbünde olan dükkân-ı mezkûrda mu‘teber olmak üzere dükkân-ı evvelin gedik kaydı ilgâ ve mersûm Avanes zimmî üzerinden ref‘ ve terkîn ve müşterî-i mersûm Kirkor zimmî üzerine kayd birle yedine sûret i‘tâ olunmak ricâsında oldukları huzûr-ı âlîlerine i‘lâm olundu. Fî 23 Muharremü’l-haram sene 1202.