İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 63 Hüküm no: 24 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ahmed’in çenber çeşidi bir gemideki yarım hissesinin, vekili es-Seyyid Halil tarafından Matos’a olan borçların ödenmesi için satılmasına engel olunmaması Ma‘rûz Sâhib-i arzuhâl es-Seyyid Halil b. İsmail nâm kimesne meclis-i şer‘-i kavîmde hâlâ İstanbul’da Ayakapısı iskelesine merbût Çenber ta‘bîr olunur sefînenin re’isi ve vâzı‘u’l-yedi olduğu şer‘an mütehakkık olan Dimitraki v. Rakatmani nâm zimmî muvâcehesinde takrîr-i kelâm edip İstanbul’da kömürcü esnâfından Ahmed b. Davud b. Ahmed’in işbu yedinde olan bir kıt‘a i‘lâm-ı şer‘î mûcebince bundan akdem hâlik olan Matos zimmînin veresesine deyni olan iki bin altı yüz guruşun edâsına mezbûrun emriyle ben kefîl olduğumdan sonra mezbûr Ahmed deyn-i mezkûrîni kable’l-edâ bin iki yüz bir senesi Zilhiccesi’nin on ikinci günü sefer-i hümâyûna azîmetinde sefîne-i mezkûrede mülk hakkı olan nısf hisse-i şâyi‘asını semen-i misliyle âhara bey‘ ve semenini ahz ü kabz ve semeniyle deyn-i mezkûrîni edâya tarafından beni tevkîl eylediğinde ben dahî ba‘de’l-kabûl sefîne-i mezkûrede nısf hissesini bi’l-vekâle âhara bey‘ murâd eylediğimde re’is-i mersûma tenbîh olunmak murâdımdır deyü ba‘de’d-da‘vâ ve’l-istintâk zimmî-i mersûm cevâbında sefîne-i mezkûrenin nısf-ı şâyi‘i mezbûr Ahmed’in mülkü olduğunu ikrâr vekâlet-i mezkûreyi inkâr etmeğin müdde‘î-i mezbûr es-Seyyid Halil ber-vech-i muharrer mezbûr Ahmed tarafından vekîl olduğunu lede’t-tezkiye adâletleri zâhir olan Mustafa b. İbrahim ve Yusuf b. Ahmed nâm kimesneler şehâdetleriyle zimmî-i mersûm muvâcehesinde ber-vech-i şer‘î isbât etmeğin mûcebiyle müdde‘î-i mezbûrun ber-vech-i muharrer vekâletine ba‘de’l-hükm nısf-ı sefîne-i mezkûreyi bi’l-vekâle bey‘ine mumâna‘at etmemek üzere re’is-i mersûm Dimitraki zimmîye tenbîh olunduğu huzûr-ı âlîlerine i‘lâm olundu. Fî 19 min Muharrem sene 1202.