İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 63 Hüküm no: 25 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akideci esnafının, kendilerine beratla tayin edilen kethüdaların işi bilmemeleri sebebiyle esnafa zulm etmeleri sebebiyle kethüda tayininin hüccet-i şer‘iyye ile olunmasını talep ettikleri Ma‘rûz Sâdır olan fermân-ı âlîlerine imtisâlen ashâb-ı arzuhâl İstanbul ve tevâbi‘inde akîde şekerciyân esnâfı ustalarından Osman Ağa ve el-Hâc Osman ve el-Hâc Mustafa Usta ve Ali Usta ve Ahmed Usta ve Yiğitbaşı Ahmed Usta ve diğer Ahmed Usta ve Hüseyin Usta ve İbrahim Usta ve Molla Osman ve es-Seyyid Hâfız Osman ve es-Seyyid Hâfız Mehmed ve Hüseyin Usta ve Mustafa Usta ve Ali Usta ve Molla Salih ve Mehmed Ağa vesâ’irleri meclis-i şer‘-i münîrde esnâf-ı mezbûre kethüdâsı Ahmed Usta b. Mustafa muvâcehesinde her biri takrîr-i kelâm edip mâtekaddemden berû esnâfımıza kethüdâ olanlar İstanbul kadıları efendilerin hüccetleriyle nasb ve ta‘yîn olunagelmişken işbu Ahmed Usta’dan mukaddem kethüdâmız olan Mustafa nâm kimesne bâ-hüccet-i şer‘iyye kıbel-i şer‘den kethüdâ nasb olundukdan sonra kemâl-i hîlesinden nâşî iğrâz-ı fâsidesini icrâ sevdâsıyla kethüdâlık-ı mezkûru berât ettirdip ben bâ-berât kethüdâyım [7a] deyü her birimizi tekdîr ve tecrîm ettikde ref‘inden mezbûr Ahmed Usta’ya tevcîh ve yedine berât-ı şerîf i‘tâ olunmağla ol dahî kezâlik berâta istînâden beynimizde mu‘teber nizâm-ı kadîmimize ri‘âyet etmeyip nizâmımızın ihtilâline bâ‘is olmağın kethüdâlık mezkûrun berât kaydı mahallinden ref‘ ve terkîn ve fîmâ-ba‘d kethüdâlık-ı mezkûr kadîm üzre bilâ-berât hüccet-i şer‘iyye ile nasb ve ta‘yîn olunmak murâdımızdır dediklerinde kethüdâlık-ı mezbûr Ahmed Usta dahî yedinde olan berâtını zâyi‘ edip ber-vech-i muharrer esnâf-ı mezbûre ustaları mezbûrunun iltimâsları üzre berâtı kaydı mahallinden ref‘ ve terkîn olunmasına râzı olduğundan mâ‘adâ mezbûr Ahmed Usta’dan mukaddem kethüdâ olan mezbûr Mustafa ve eslâfı öteden berû bilâ-berât hüccet-i şer‘iyye ile kethüdâ nasb olunagelmişken ibtidâ’en mezbûr Mustafa berât ettirdiği işbu arzuhâlde mastûr derkenârda dahî müstebîn olmağın kethüdâlık-ı mezkûrun berâtı kaydı mahallinden ref‘ ve terkîn olunup fîmâ-ba‘d kadîm üzere bilâ-berât hüccet-i şer‘iyye ile kethüdâ nasb ve ta‘yîn olunmak bâbında emr-i âlîşân i‘tâ buyurulmak ricâsında oldukları huzûr-ı âlîlerine i‘lâm olundu. Fî gurre-i Saferi’l-hayr sene 1202.