İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 64 Hüküm no: 26 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Abdullah ile Marangoz Parseh v. Lut’un kereste masrafı ve ev inşasından alacak verecek davalarından feragat ettikleri Ma‘rûz Neccâr kalfalarından derûn-ı arzuhâlde mastûrü’l-ism Parseh v. Lut nâm zimmî meclis-i şer‘-i enverde silahşor-ı hazret-i şehriyârî sâhibü’l-arzuhâl Mehmed Ağa b. Abdullah tarafından ber-vech-i âtî vekîl olduğu Süleyman Ağa b. İbrahim ve Mehmed Efendi b. Hasan şehâdetleriyle sâbit olan Hâfız Süleyman Efendi b. Yusuf mahzarında müvekkil-i mûmâileyh bin yüz doksan dokuz senesi Rebîülâhiri’nde İstanbul’da Timurkapı kurbünde Elvânzâde mahallesinde vâki‘ mutasarrıf olduğu muhterik menzil arsası üzerine i‘tâ eylediğim defterde tahrîr olunan kereste ile beher zirâ‘ı on beşer guruşa müceddeden bir bâb menzil binâ etmek üzere benim ile ba‘de’l-mukâvele ve’l-kabûl ben dahî arsa-i mezkûre üzerine terbî‘an üç yüz seksen iki zirâ‘ buyût-ı adîde ve müştemilât-ı ma‘lûmeyi hâvî bir bâb menzil ve terbî‘an yirmi sekiz zirâ‘ bir kargir hamâm binâ ve tekmîl ve müvekkil-i mûmâileyhden altı bin dokuz yüz otuz altı guruşu kabz etmişidim lâkin müvekkil-i mûmâileyh menzil-i mezkûru mukâvele olunan keresteden dûn kereste ve arsa-i mezkûrede mevcûd enkâz-ı ma‘lûme ile mahlûten binâ etmekle beher zirâ‘ı on beşer guruşa mütehammil değildir dedikde ben dahî menzil-i mezkûra masrûfum dokuz bin sekiz yüz yirmi dokuz guruşa bâliğ olmağla meblağ-ı mezkûrdan makbûzum olan altı bin dokuz [yüz] otuz altı guruşu firu-nihâde olunup bâkî kalan iki bin sekiz yüz doksan üç guruşu müvekkil-i mûmâileyhden taleb eylediğime binâ’en menzil-i mezkûr bâ-fermân-ı âlî ma‘rifet-i şer‘ ve mi‘mâr ağa ma‘rifetiyle keşf ve mesâha ve takvîm olundukda işbu bir kıt‘a mümzâ ve mahtûm mi‘mâr ağa defteri nâtık olduğu üzere menzil-i mezkûrun hamâm-ı mezkûr ile ma‘an bi’l-cümle ebniyesinin kıymetleri altı bin altı yüz seksen iki buçuk guruşa bâliğ olmağla vekîl-i mezbûr ziyâde makbûzun olan iki yüz elli üç buçuk guruşu bi’l-vekâle benden taleb ve da‘vâya tasaddî ve ol vecihle beynimizde ba‘de vukû‘i’l-münâza‘a elhâletü hâzihî vekîl-i mezbûr iki yüz elli üç buçuk guruş da‘vâsından meccânen fâriğ olup husûs-ı mezkûra müte‘allika da‘vâdan benim zimmetimi bi’l-vekâle ibrâ ve iskât eyledikde ben dahî iddiâ eylediğim iki bin sekiz yüz doksan üç guruşa ve menzil-i mezkûrun bi’l-cümle ebniyesine ve târîh-i i‘lâma gelince beynimizde ceryân eden cemî‘ hukûk-ı şer‘iyye-i sâ’ireye müte‘allika âmme-i da‘vâdan müvekkil-i mûmâileyhin zimmetini ibrâ’-i âmm ile ibrâ ve iskât ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde vekîl-i mezbûr dahî mukırr-ı merkûmu tasdîk ve bi’l-vekâle ibrâsını kabûl ve bu vecihle kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî 5 Saferü’l-hayr sene 1202.