İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 65 Hüküm no: 27 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Ahmed’in vekili es-Seyyid Halil’in, Toros’daki yarım gemi hissesi alacağını oğlu Agob’a açması sebebiyle davasının geçersiz olduğu Ma‘rûz Sâhib-i arzuhâl es-Seyyid Halil b. İsmail meclis-i şer‘-i münîrde derûn-ı arzuhâlde mezkûrü’l-ism Agob v. Toros zimmî muvâcehesinde takrîr-i kelâm edip İstanbul’da Ayakapısı iskelesinde merbût Çenber ta‘bîr olunur sefîne Kömürcü Ahmed b. Davud ile mersûm Agob zimmînin babası gâ’ib ani’l-beled mesfûr Toros zimmînin ale’l-iştirâki’s-sevî mülkleri olup işbu yedimde olan i‘lâm-ı şer‘î nâtık olduğu üzre mezbûr Ahmed bir buçuk ay mukaddem sefer-i hümâyûna azîmetinde sefîne-i mezkûrede nısf hissesini semen-i misliyle âhara bey‘a ve semeni ile i‘lâmda mezkûr düyûnunu edâya tarafından beni tevkîl eylediğini vâzı‘u’l-yed olan Re’is [7b] Dimitraki zimmî muvâcehesinde ber nehc-i şer‘î isbât edip lâkin sefîne-i mezkûreden hâsıla olan fâ’idesinin hesâbını rü’yete dahî beni vekîl etmekle mersûm Agob zimmî sefîne-i mezkûrenin nısf-ı âharına mutasarrıf olup diyâr-ı âharda olan mesfûr Toros zimmînin oğlu olmağla sefîne-i mezkûrenin hesâbını rü’yet ve menâfi‘inden iktizâ eden meblağı müvekkil-i merkûm Ahmed içün bana teslîme mersûm Agob zimmîye tenbîh olunmak bi’l-vekâle murâdımdır deyü takrîri üzre mersûm Agob zimmî mücerred gâ’ib-i mesfûrun oğlu olmağla husûs-ı mezkûrda gâ’ib-i mesfûr tarafından bilâ-tevkîl hasm-ı şer‘î olmamağın müdde‘î-i merkûmun mersûm Agob zimmîden da‘vâsı meşrû‘a olmamağla da‘vâ-yı mezkûresine iltifât olunmayıp bî-vech mu‘ârazadan men‘ olunduğu huzûr-ı âlîlerine i‘lam olundu. Fî 5 S. sene 1202.