İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 66 Hüküm no: 29 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin kasap dükkanındaki gedik hissesi ve aletlerini Mehmed Tahir’e sattığı Ma‘rûz Evkâf-ı hazret-i şehriyârîden Birinci Selhhâne’ye merbût olup mahrûse-i Galata’ya muzâfa kasaba-i Kasımpaşa’da köprü üstünde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf hisse-i şâyi‘alarına bâ-temessük-ı mütevellî mutasarrıf olan Ahmed b. Ali tarafından husûs-ı âtîde vekîl olduğu Hasan b. Abdullah ve Ali b. Mehmed nâm kimesneler şehâdetleriyle sâbit olan Mustafa b. Mehmed nâm kimesne meclis-i şer‘-i münîrde Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa hâzır olduğu hâlde âlât-ı mezkûrenin nısf-ı âharına mutasarrıf olan kasab ustalarından Mehmed Tahir b. Ahmed muvâcehesinde bi’l-vekâle takrîr-i kelâm edip müvekkilem mezbûr Ahmed ber-vech-i muharrer mutasarrıf olduğu nısf âlât-ı mezkûresini hüsn-ı rızâ ve ihtiyârıyla bedel-i ma‘lûm mukâbelesinde bâ-ma‘rifet-i mütevellî mezbûr Mehmed Tahir’e ferâgat ve kasr-ı yed edip nısf âlât-ı mezkûrda müvekkil-i mezbûrun alâka ve medhali kalmayıp mezbûr Mehmed Tahir’in hakk-ı mufavvazı olmuşdur dedikde ol dahî ba‘de’t-tasdîk nısf âlât-ı mezkûre nısf-ı âhırının mutasarrıfı merkûm Mehmed Tahir üzerine defter-i vakfa kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 13 Saferü’l-hayr sene 1202. Derkenar: Kasab