İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 68 Hüküm no: 31 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen el-Hâc Ali’nin İbrail’deki iş ortağı Mahmud Ağa’nın üç yıllık muhasebesinin görülmesi için varisler ve alacaklıların İstanbul’a getirilmesine dair emr-i alişan talep ettikleri Ma‘rûz Mahrûse-i Galata Yağ Kapanı tüccârından el-Hâc Ömer Ağa ve Ahmed Ağa ve el-Hâc Mustafa Ağa ve Mehmed Ağa ve el-Hâc Ali Ağa ve Hasan Ağa ve İbrahim Ağa ve Molla Abdi ve el-Hâc Abdurrahman nâm kimesneler meclis-i şer‘-i kavîmde kapan-ı mezkûr tüccârından olup Tophâne’de Sakabaşı mahallesinde sâkin iken bundan akdem vefât eden el-Hâc Ali b. Mustafa’nın hasren veresesi zevce-i metrûkesi sâhibe-i arzuhâl ma‘rifetü’z-zât Fatma bt. Abdurrahman ve sulbî kebîr oğlu Osman ve Murâhık oğlu İsmail hâzırûn oldukları hâlde her biri takrîr-i kelâm edip müteveffâ-yı mezbûr el-Hâc Ali hayâtında tüccâr-ı kapan-ı mezkûrdan olup hâlâ İbrail’de sâkin Mehmedcikoğlu dimekle ma‘rûf Mahmud Ağa ile şerîkler olmağla ba‘de’l-vefât mezbûr Mahmud Ağa tarafından vekîl Hüseyin Ağa nâm kimesne ile verese-i mezbûrûn ma‘rifetimiz ile üç senelik hesâb-ı şirketlerini rü’yet ve merkûm Mahmud Ağa zimmetine iktizâ eden meblağı verese-i mezbûrûna irsâl etmek içün merkûm Mahmud Ağa’ya mektûb ile ifâde olundukda bir vecihle hesâb-ı mezkûre râzı olmamağın bi’n-nefs merkûm Mahmud Ağa ile hesâbları rü’yet olunmağa muhtâcdır deyü her biri ba‘de’l-ihbâr verese-i mezbûrûn dahî ber-vech-i muharrer üç senelik hesâblarını bi’n-nefs rü’yet içün merkûm Mahmud Ağa mübâşir ma‘rifetiyle Âsitâne-i aliyye’ye ihzâr ve ihkâk-ı hak olunmak bâbında tuğrâ-yı garrâ ile mu‘anven emr-i âlîşân sudûru istid‘âsında oldukları huzûr-ı âlîlerine i‘lâm olundu. Fî 13 Saferü’l-hayr sene 1202. Derkenar: Debbâğ