İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 68 Hüküm no: 32 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hatun’un evinin tuvalet suları için kuyu kazdırması Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel İkinci Kâtib Ahmed Efendi hâssa mi‘mârı hulefâsından el-Hâc Abdullah ve Mehmed Halîfeler ile İstanbul’da Sultan Mehmed Câmii civârında Hoca Hayreddin mahallesinde Üçemirler Türbesi ittisâlinde vâki‘ derûn-ı arzuhâlde mezkûretü’l-ism Zeyneb bt. Abdullah nâm hatunun Osman Efendi Vakfı’ndan mutasarrıf olduğu menzile varıp huzûr-ı Müslimîn’de ba‘de akdi’l-meclis sâhib-i arzuhâl Üçemirler türbedârı ve vakfının mütevellîsi eş-Şeyh Mahmud Efendi b. es-Seyyid Mehmed meclis-i ma‘kûd-ı mezkûrda menzil-i mezkûrun vâkıfı ve hâlâ mütevellîsi mezbûr Osman Efendi tarafından vekîl-i şer‘îsi Abdullah Ağa b. Ali hâzır olduğu hâlde ma‘rifetü’z-zât mezbûre Zeyneb Hatun mahzarında mezbûre Zeyneb Hatun’un menzilinin kable’l-harîk kenîfleri çirkâbı ittisâlinde vâki‘ menzil derûnundan ceryân eder iken ba‘de’l-harîk sed olunmağla mezbûre Zeyneb Hatun kenîfleri çirkâbı türbe-i mezkûre dîvârına muttasıl hafr ve ihdâs eylediği kuyuya icrâ birle türbe-i mezkûre ittisâlinde vâki‘ odanın dîvârına neşf eylediğinden mâ‘adâ türbe-i mezkûrede olan bi’r-i mâya karîb olup ol vecihle zarar-ı bîni olmağla zararını def‘a mezbûre Zeyneb Hatun’a tenbîh olunmak matlûbumdur dedikde mi‘mârân-ı mezbûrân Müslimûn hâzırûn ile ba‘de’l-keşf ve’l-mu‘âyene fi’l-hakîka mezbûre Zeyneb Hatun’un hafr eylediği çirkâb kuyusu türbe-i mezkûrede olan bi’r-i mâya karîb ve çirkâbını oda-i mezkûre dîvârına neşf ve zarar-ı bîni olduğunu ve mârrü’z-zikr kuyuyu sed ve bend ve matbah önünde tûlen dört zirâ‘ bu‘du olan mahalle müceddeden kuyu hafr ve kenîfleri çirkâbını setr-i lağam ile cedîd kuyuya icrâ ile zararı mündefi‘ olur deyü haber vermeleriyle kâtib-i mezbûr ber-vech-i muharrer zararını def‘a mezbûre Zeyneb Hatun’a tenbîh eylediğini ma‘an mürsel ümenâ-i şer‘le meclis-i şer‘a ba‘de’l-inhâ İstanbul Mahkemesi’nden huzûr-ı âlîlerine i‘lâm olundu. Fî 15 Saferü’l-hayr sene 1202. Derkenar: Hoca Hayreddin mahallesinde keşf-i lağam