İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 69 Hüküm no: 33 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumhanelere verilecek iç yağlarının dağıtım nizamlarının belirlenmesi Ma‘rûz Sâdır olan fermân-ı âlîlerine imtisâlen medîne-i Üsküdar’da Vâlide-i Atîk Câmi-i Şerîfi Vakfı’ndan Atbazarı’nda vâki‘ mumhânenin nısfına mutasarrıf olan el-Hâc Ömer’in işbu arzuhâli hâmişinde ve zeylinde olan [8b] derkenârlara nazar olundukda İstanbul’da mîrî selhhânelerde zebh olunan ağnâmın bi’l-cümle râyic yağları narh-ı cârî üzere mumhâne-i mezkûre verilip âhardan dahl ve ta‘arruz olunmamak üzre sâdır olan emr-i âlî Harameyn muhâsebesinde mukayyed olmağla vâki‘ olan cülûs-ı hümâyûnlarda tecdîd olunduğu ve altmış sekiz târihinde mumhâne-i mezkûr müste’cirleri İbrahim ile Yani ve Kosta ve Dimitri nâm zimmîler Yedikule hâricinde olan mumcu esnâfının kethüdâları ve ustaları ile husûs-ı mezkûrda nizâ‘a tasaddî eylediklerinde mâ-tekaddemden berû Kurenâ defterlerinde mukayyed olduğu üzre Yedikule hâricinde vâki mîrî selhhânelerde zebh olunan ağnâmın iç yağları şehr-i gurresinden beş gün tamâmına değin akşam ve sabah hâsıl olan kalîl ve kesîr iç yağı Dergâh-ı âlî yeniçerileri meydanı içün ocak mumcularına ve altıncı gününden yirminci günü tamâmına değin kezâlik akşam ve sabah hâsıl olan iç yağları Yedikule hâricinde vâki‘ mumhânelere ve bâkî on günün sabahlarında hâsıl olan iç yağları Üsküdar’da Atbazarı’nda vâki‘ mumhâne-i mezkûre ve akşamlarında hâsıl olan iç yağları yine Yedikule’de olan mumhânelere verile geldiğinden tarafyenden her biri ittifâk ve ittihâd ve her biri ber-vech-i muharrer kadîmden beru alageldiği növbetinde hâsıl olan iç yağına kanâ‘at edip fîmâ ba‘d tarafeynden növbet-i mezkûresine adem-i kanâ‘at ile ziyâde yağ mutâlebe eder olur ise hizmetinden ve kârhâneden tard ve ib‘âd olunmak üzere ictimâ‘ ve ittifâk ve ahd-i mîsâk edip işbu şurût düstûrü’l-amel tutulmak bâbında emr-i âlîşân sudûru istid‘âsında olduklarını târîh-i mezkûrda İstanbul kadısı Halil Efendi i‘lâm etmeğin i‘lâmı mûcebince şurût-ı mezkûreyi hâvî kat‘iyyü’l-mefâd bir kıt‘a emr-i âlîşân sâdır olup ba‘dehû kezâlik cülûs-ı hümâyûnlarda tecdîd olunduğu derkenârlardan müstefâd oldukdan sonra tarafeynden her biri istintâk olundukda Yedikule’de mumcular kethüdâsı ve ustaları mâ-tekaddemden ilâ hâze’l-ân bizim yedimizde olan emr-i âlî mûcebince amel olunagelip Harameyn muhâsebesinden bir takrîb ısdâr olunan emr-i âlî-i mezkûr bu âna değin izhâr olunmayıp ve izhâr ve amel olunduğu sûretde dahî bizim yedimizde olan emr-i âlîye ve nizâm-ı kadîmimize muğâyir ve umûr-ı mumciyân ve yeniçeri ocağının mum husûsu muhtel ve müşevveş olur dediklerinde Üsküdar’da mumhâne-i mezkûrun nısf-ı âharına mutasarrıf olan Süleyman b. Ahmed Yedikule mumcuları mezbûrûnu takrîrât-ı meşrûhalarında tasdîk ile da‘vâ ve nizâ‘a tasaddî etmeyip mezbûr el-Hâc Ömer’den otuz dört senesinden beru Yedikule mumcularının yedlerinde olan emr-i âlî mûcebince amel olunageldiğine mukır ve mu‘terif iken mücerred Harameyn muhâsebesinden emr-i âlî verilmiş olmağla mûcebince mîrî selhhânelerde zebh olunan ağnâmın mecmû‘ iç yağlarını mutasarrıf olduğu mumhâne-i mezkûr içün taleb ederim deyü iddi‘âsı takrîrî üzre cümle ittifâkıyla otuz dört seneden beru mazmûnuyla amel olunagelen emr-i âlîşâna ve nizâm-ı kadîmlerine muğâyir olduğundan mâ‘adâ takrîrleri üzre yeniçerileri kışlalarının mumlarını beher kıyyesi yirmişer akçeye olmak üzere Yedikule mumcuları vermekle ihtilâl-i nizâm-ı mer‘îye bâdî olacak mevâddan olmağla yine kadîmi üzere Yedikule hâricinde vâki‘ mîrî selhhânelerde zebh olunan ağnâmın iç yağları beher şehir gurresinden beş gün tamâmına değin akşam ve sabah hâsıl olan iç yağı yeniçeriler meydanı içün ocak mumcularına ve altıncı gününden yirminci günü tamâmına değin kezalik akşam ve sabah hâsıl olan iç yağları Yedikule’de olan mumhânelere ve bâkî on günün sabâhlarında hâsıl olan iç yağı Üsküdar’da mumhâne-i mezkûre ve akşamlarında yine Yedikule’de olan mumhânelere verilmek üzere yedlerinde olan emr-i âlîyi mü’ekked emr-i âlîşân i‘tâ buyurulmak bâbında huzûr-ı âlîlerine i‘lâm olundu. Fî 25 Saferü’l-hayr sene 1202.