İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 71 Hüküm no: 34 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foça v. Yenaki’nin kasab dükkanlarındaki gedik hisse ve aletlerini Liko v. Preşkova, Kiro v. Kika, Kosta v. Preşkova’ya sattığı Ma‘rûz Evkâf-ı hazret-i şehriyârîden Üçüncü Selhhâne’ye merbût olup Galata’da Saray-ı hümâyûn ittisâlinde Selhhâne önünde vâki‘ bir bâb ve yine saray-ı mezkûr ittisâlinde sebzeci dükkânına muttasıl bir bâb ve Beyoğlu’nda dört yol ağzında bir bâb ve Yazıcı Câmii ittisâlinde bir bâb ve Karaköy Kapısı dâhilinde attâr dükkânına muttasıl bir bâb ve Fındıklı’da sebzeci dükkânına muttasıl bir bâb ve Fîruz Ağa mahallesinde kolluk karşısında Ağa Hamâmı’na muttasıl bir bâb ve Beyoğlu’nda Ağa Câmii kurbünde simitçiye muttasıl bir bâb ve yine (sah) ve Beyoğlu’nda Ketohorye mahallesinde berber dükkânı karşısında bir bâb ve Birinci Selhhâne’ye merbût Fındıklı’da kolluk karşısında vâki‘ bir bâb ki cem‘an on bâb kasab dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmelerin bâ-temessük-ı mütevellî mutasarrıfı Foça v. Yenaki nâm zimmî [9a] meclis-i şer‘-i münîrde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından Mehmed Said Ağa hâzırân oldukları hâlde kasab ustalarından Liko v. Preşkova ve Kiro v. Kika ve Kosta v. Preşkova nâm zimmîler muvâcehelerinde takrîr-i kelâm edip bâlâda mezkûr dekâkîn derûnlarında mutasarrıf olduğum âlât-ı mezkûrelerin her biri beşer sehm i‘tibârıyla ikişer sehmlerini mersûm Liko zimmîye ve ikişer sehimlerini dahî mesfûr Kiro zimmîye ve birer sehimlerini dahî mersûm Kosta zimmîye bedel-i ma‘lûme mukâbelesinde bâ-re’y-i mütevellî ferâgat ve kasr-ı yed eylediğimde anlar dahî ber-vech-i muharrer kabûl edip fîmâ ba‘d âlât-ı mezkûrelerde benim kat‘â alâka ve medhalim kalmayıp ber-vech-i meşrûh mesfûrûnun bi’l-iştirâk hakk-ı mufavvazları olmuşdur dedikde mesfûrûn dahî ba‘de’t-tasdîk mârrü’z-zikr on bâb dükkânların her birinde olan âlât-ı mezkûreleri beşer sehm i‘tibârıyla ikişer sehimleri mersûm Liko zimmî üzerine ve ikişer sehimleri dahî kezâlik mersûm Kiro zimmî üzerine ve birer sehimleri mesfûr Kosta zimmî üzerine defter-i vakfa kayd birle fâriğ-i mersûmun atîk temessükleri cânib-i vakfda hıfz olunup her birinin yedine müceddeden temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 23 Saferü’l-hayr sene 1202. Derkenar: Kasab