İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 72 Hüküm no: 35 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in kasap dükkanındaki gedik hissesi ve aletlerini el-Hâc Ali b. Mehmed ile Ahmed b. Ebubekir’e sattığı Evkâf-ı hazret-i şehriyârîden Dokuzuncu Selhhâne’ye merbût olup İstanbul’da Tavukbazarı’nda köşebaşında Çilingirler sûkunda vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf hisse-i şâyi‘asına bâ-temessük-ı mütevellî mutasarrıf olan Mustafa b. Mehmed meclis-i şer‘-i kavîmde hâlâ Kasabbaşı Mehmed Emin Ağa tarafından vekîl-i Kassâbân Kethüdâsı el-Hâc Ali Ağa ve ustalarından el-Hâc Osman ve Mehmed Emin hâzırûn oldukları hâlde kasab ustalarından oldukları mezbûrûnun ihbârlarıyla zâhir olan el-Hâc Ali b. Mehmed ve Ahmed b. Ebubekir muvâcehelerinde takrîr-i kelâm edip ber-vech-i muharrer mutasarrıf olduğum nısf-ı âlât-ı mezkûremi hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mezbûrân el-Hâc Ali ve Ahmed’e ale’l-iştirâki’s-sevî ferâgat ve kasr-ı yed edip fîmâ ba‘d nısf-ı âlât-ı mezkûrede benim kat‘â alâka ve medhalim kalmayıp mezbûrânın hakk-ı mufavvazları olmuşdur dedikde mezbûrân dahî ba‘de’t-tasdîk yine nısf-ı âlât-ı mezkûre mezbûr Mustafa’nın ferâgından defter-i vakfa mezbûrân el-Hâc Ali ve Ahmed üzerlerine kayd birle yedlerine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 3 Rebî‘ü’l-evvel sene 1202. Derkenar: Kasab