İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 72 Hüküm no: 36 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin b. Ali’nin kasab dükkanındaki gedik hissesi ve aletlerini Süleyman Usta’ya sattığı Ma‘rûz Evkâf-ı hazret-i şehriyârîden Yedinci Selhhâne’ye merbût olup medîne-i Üsküdar’da Meyyitkapısı’nda vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfına bâ-temessük-ı mütevellî mutasarrıf olan Mehmed Emin b. Ali nâm müteveffânın hasren sulbî kebîr oğlu olduğu işbu meclis-i şer‘a hâzırûn olan Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından el-Hâc Osman ve Mehmed Emin ihbârlarıyla zâhir olan İbrahim nâm kimesne meclis-i şer‘-i münîrde yine kasab ustalarından Süleyman b. el-Hâc Ömer muvâcehesinde takrîr-i kelâm edip ber-vech-i muharrer babam müteveffâ-yı mezbûrdan hasbe’l-âde bana intikâl eden nısf âlât-ı mezkûreyi hüsn-ı rızâ ve ihtiyârımla bâ-ma‘rifet-i mütevellî bedel-i ma‘lûm mukâbelesinde mezbûr Süleyman Usta’ya ferâgat ve kasr-ı yed edip fîmâ-ba‘d nısf-ı âlât-ı mezkûrede benim kat‘â alâka ve medhalim kalmayıp mezbûr Süleyman Usta’nın hakk-ı mufavvazı olmuşdur dedikde ol dahî ba‘de’t-tasdîk nıfs-ı âlât-ı mezkûre müteveffâ-yı mezbûra intikâlinden oğlu mezbûr İbrahim üzerine onun dahî ferâgından merkûm Süleyman Usta üzerine defter-i vakfa kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 4 Rebî‘ü’l-evvel sene 1202. Derkenar: Kasab