İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 73 Hüküm no: 37 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. İsmail’in kasab dükkanındaki gedik hissesi ve aletlerini Nikola v. Paço’ya sattığı Ma‘rûz Evkâf-ı hazret-i şehriyârîden Dördüncü Selhhâne’ye merbût olup mahrûse-i Galata’ya muzâfa Rumeli Fenarı’nda vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfına bâ-temessük-ı mütevellî mutasarrıf olan Osman b. İsmail nâm kimesne meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından Mehmed Emin ve el-Hâc Osman hâzırûn oldukları hâlde kasab ustalarından Nikola v. [9b] Paço nâm zimmî muvâcehesinde takrîr-i kelâm edip ber-vech-i muharrer mutasarrıf olduğum nısf-ı hisse-i âlât-ı mezkûrenin nısfını kendi tasarrufumda ibkâ ve nısf-ı âharını hüsn-ı rızâ ve ihtiyârım ile bâ-emr-i mütevellî bedel-i ma‘lûm mukâbelesinde mesfûr Nikola zimmîye ferâgat ve kasr-ı yed edip fîmâ ba‘d mecmû‘ âlât-ı mezkûre dört sehim i‘tibârıyla rub‘ hissesi benim tasarrufumda ve rub‘-ı âharı dahî mesfûr Nikola zimmînin hakk-ı mufavvazı olmuşdur dedikde mesfûr Nikola ba‘de’t-tasdîk âlât-ı mezkûrenin rub‘ hissesi mezbûr Osman ferâğından defter-i vakfa mesfûr Nikola zimmi üzerine kayd birle yedine başka temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 3 Rebî‘ü’l-evvel sene 1202. Derkenar: Rumelifenarı’nda Kasab