İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 73 Hüküm no: 38 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid İsmail b. Hüseyin’in Yusuf b. Abdullah’taki alacağını talep ettiği Ma‘rûz Sâdır olan fermân-ı âlîlerine imtisâlen sâhib-i arzuhâl es-Seyyid İsmail b. Hüseyin dîvân-ı âlîlerinde ma‘kûd meclis-i şer‘-i kavîmde arzuhâlde mezkûrü’l-ism Yusuf b. Abdullah muvâcehesinde takrîr-i kelâm edip târîh-i i‘lâmdan yedi ay mukaddem mezbûr Yusuf’a mâlımdan karz olmak üzere idâne ve teslîm eylediğim yüz on iki guruş hakkımın on iki guruşuyla beni Kigork nâm zimmî üzerine ba‘de’l-havâle ve’l-kabûl bâkî yüz guruşu mezbûr Yusuf’dan taleb ederim deyü ba‘de’da‘vâ ve’l-istintâk mezbûr Yusuf cevâbında ber-vech-i muharrer müdde‘î-i mezbûrdan yüz on iki guruş istidâne ve kabz eylediğini ikrâr lâkin târîh-i mezkûrdan iki ay murûrunda meblağ-ı mezkûr guruşdan müdde‘î-i mezbûr ile sîmli bir kılıç ve bir kılâbdanlı duhân kisesi ve bir çevre ve bir uçkur üzerlerine ba‘de’s-sulh ve’l-kabûl bedel-i sulh-ı mezkûrları müdde‘î-i mezbûra teslîm ol dahî yedimden ahz u kabz edip meblağ-ı mezkûr yüz guruşa müte‘allika âmme-i da‘vâdan zimmetimi ibrâ etmişdir deyü ba‘de’d-def‘ ve’s-suâl ve’l-inkâr dâfi‘-i mezbûr Yusuf’dan def‘-i mezkûrını mübeyyine beyyine taleb olundukda ba‘de’l-istimhâl ve’l-imhâl on beş gün tamâm olup ityân-ı beyyineye kādir olmadığımdan mâ‘adâ tahlîfe dahî tâlib olmamağla ikrârı mûcebince meblağ-ı bâkî mezkûr yüz guruşu müdde‘î-i mezbûr es-Seyyid İsmail edâya merkûm Yusuf’a tenbîh olunduğu huzûr-ı âlîlerine i‘lâm olundu. Fî 2 Rebî‘ü’l-evvel sene 1202. Derkenar: 100 hükm