İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 74 Hüküm no: 39 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sirope v. Zakar’ın Mehrab v. İstefan’daki alacağını talep ettiği Ma‘rûz Arzuhâl eden Sirope v. Zakar nâm zimmî meclis-i şer‘-i münîrde arzuhâlde mezkûrü’l-ism Mehrab v. İstefan nâm zimmî ile terâfu‘larında yirmi ay mukaddem mâlımdan mersûm Mehrab zimmîye karz-ı şer‘î olmak üzere altı yüz guruş idâne ve teslîm ol dahî yedimden ahz u kabz ve umûruna sarfla istihlâk edip meblağ-ı mezkûr cihet-i mezkûrede hâlâ zimmetinde hükm olmağla taleb ederim deyü ba‘de’d-da‘vâ ve’s-suâl mersûm Mehrab zimmî cevâbında ber-vech-i muharrer müdde‘î-i mesfûrdan altı yüz guruş ahzını ikrâr lâkin târîh-i mezkûrdan on beş ay sonra müdde‘î-i mesfûra mâlımdan altı yüz guruşa ma‘lûmü’l-mikdâr dülbend bey‘ ve teslîm ve semen-i mezkûru deynim olan meblağ-ı mezkûra takâs ol dahi mukâssa ve kabûl edip bu vecihle deynim olan meblağ-ı mezkûru müdde‘î-i mesfûra edâ eyledim deyü ba‘de’d-def‘ ve’l-istintâk müdde‘î-i mersûm Sirope cevâbında mesfûr Mehrab zimmînin def‘-i mezkûrunu inkârından mâ‘adâ mesfûr Mehrab zimmî cihet-i mezkûreden zimmetinde bana altı yüz guruş deyni olduğunu elyevm ikrâr ve i‘tirâf dahî etmişidi deyü ba‘de’d-def‘ ve’s-suâl ve’l-inkâr müdde‘î-i mersûmun def‘-i mezkûruna Alacacı Zakar v. Bedros ve Karabet v. Karbeşah nâm zimmîler mesfûr Mehrab zimmî muvâcehesinde edâ-i şehâdet-i şer‘iyye eylediklerinde mersûm Mehrab zimmî şâhidân-ı mesfûrânı şehâdet-i mezkûrelerinde tasdîk etmeğin mûcebiyle meblağ-ı mezkûr altı yüz guruşu müdde‘î-i mesfûra edâ ve teslîme mersûm Mehrab zimmîye şer‘an tenbîh olunduğu huzûr-ı âlîlerine i‘lâm olundu. Fî 29 Saferü’l-hayr sene 1202. Derkenar: 600 hüküm