İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 75 Hüküm no: 40 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ali ile Molla Ahmed’in üçte birlik kasab dükkanı gedik hisse ve aletlerini Abdülgafur’a feragat ettikleri Ma‘rûz Evkâf-ı hazret-i şehriyârîden Birinci Selhhâne’ye merbût olup İstanbul’da Çatladıkapı dâhilinde na‘alband dükkânına muttasıl bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme üç hisse i‘tibârıyla sülüsânına bâ-temessük-ı mütevellî mutasarrıfân olan el-Hâc Ali b. Mehmed ve Molla Ahmed b. Bekir’den her biri meclis-i şer‘-i münîrde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından el-Hâc Osman ve Mehmed Emin hâzırûn oldukları hâlde kasab ustalarından olduğu kethüdâ ve ustaları mezbûrûnun ihbârlarıyla zâhir olan Abdülgafur b. Mustafa tarafından vekîl-i şer‘îsi Mustafa b. Mehmed muvâcehesinde takrîr-i kelâm edip ber-vech-i muharrer mutasarrıf olduğumuz sülüsân âlât-ı mezkûremizi hüsn-ı rızâ ve ihtiyârımız ile bâ-ma‘rifet-i mütevellî bedel-i ma‘lûm mukâbelesinde [10a] müvekkil-i mezbûr Abdülgafur’a ferâgat ve kasr-ı yed edip fîmâ ba‘d âlât-ı mezkûrenin sülüsân hissesinde benim bizim alakâ ve medhalimiz kalmayıp müvekkil-i mezbûrun hakk-ı mufavvazı olmuşdur dediklerinde vekîl-i mezbûr dahî tasdîk etmeğin âlât-ı mezkûrenin sülüsân hissesi mezbûrânın ferâğlarından defter-i vakfa müvekkil-i mezbûr Abdülgafur üzerine kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 3 Ra. sene 1202. Derkenar: Çatladıkapı’daı Kasab