İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 75 Hüküm no: 41 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sayıcı Dimitri v. Vasil’in kendisine zulm eden Hristo v. Dimitri’den şikayetçi olduğu Ma‘rûz Sâdır olan fermân-ı âlîlerine imtisâlen sâbıkan kasabbaşı ağalar taraflarından sayıcı olup arzuhâl eden Dimitri v. Vasil nâm zimmî meclis-i şer‘-i kavîmde arzuhâlde mezkûrü’l-ism Tırhala re‘âyâsından Hristo v. Dimitri nâm zimmî muvâcehesinde takrîr-i kelâm edip ben dâ’imâ kendi hâlimde ırzım ile mukayyed ve sâbıkan kasabbaşı ağaların dört beş sene sadâkat ile sayıcılık hizmetinde olup kimesneye kat‘â ta‘addî ve rencîdem olmayıp cümle kassâbân ve re‘âyâ benden hoşnûd ve râzı olmalarıyla hâlâ kasabbaşı ağa dahî beni hizmet-i mezkûrda istihdâm murâd eylediğinde mersûm Hristo zimmînin bana adâvet ve nefsâniyeti olmağla icrâ-yı i‘râz-ı fâside sevdâsıyla benim hakkımda tuğyân üzre olan Kara Ahmed nâm şakînin avanesinden ve sa‘î bi’l-fesâddır deyü bana ifk ü iftirâ etmekle kassâbân ustalarından ve fi’l-aslı mütemekkin olduğum Yenişehir Fenar ve etrâfında olan kazâların re‘âyâsından keyfiyet-i hâlim suâl ve ihbârları i‘lâm olunmak murâdımdır dedikde mersûm Hristo zimmî ber-vech-i muharrer mesfûr Dimitri hakkında sû-i hâlini müş‘ir kelimât söylemedim deyü inkârından mâ‘adâ hâlâ Kasablar Kethüdâsı el-Hâc Ali Ağa ve ustalarından el-Hâc Osman ve Mehmed Emin ve es-Seyyid Ahmed ve Hüseyin ve Yenişehir Fenar kazâsından Mustafa b. Mehmed ve Abdullah b. Hüseyin ve Hasan b. Mehmed ile zimmî re‘âyâsından Dimitri ve diğer Dimitri ve âhar Dimitri ve yine Dimitri ve Yorgi ve Nikola ve Pano ve yine âhar Dimitri ve Yani ve Yorgi ve diğer Yani ve Yorgaki ve Dömekeli Kostanti ve Ağrıbe ve Badracık ve Ermiye ve Livâdiye ve Çatalca kazâları re‘âyâsı vekîlleri İsteryo ve Dimitri ve Yorgaki ve Anaştaş ve Yorgi vesâ’ir otuz neferden mütecâviz mazbûtü’l-esâmî re‘âyâdan istihbâr olundukda fi’l-hakîka mersûm Dimitri dâ’imâ kendi hâlinde ırzıyla mukayyed ve sâbıkan sadâkat ile sayıcılık hizmetinde müstahdem olduğundan mâ‘adâ öteden berû kimesneye rencîde ve ta‘addîsi olmamağla cümlemiz kendisinden hoşnudlar olup bâlâda zikr olunduğu üzere mersûm Dimitri hakkında şakî-i mezbûr Kara Ahmed’in avanesinden olup şakâvet ve sâ‘î bi’l-fesâd isnâdı ifk ü iftirâdır deyü her biri meclis-i şer‘de ihbâr eyledikleri huzûr-ı âlîlerine i‘lâm olundu. Fî 6 Rebî‘ü’l-evvel sene 1202. Derkenar: Kasab