.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 118
Hüküm no: 123
Orijinal metin no: [19a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hasan Bey’in vârislerinden Fâtıma ve Ayşe’nin evlerini Alime Hatun’a sattıkları

Dârü’s-saltanatü’s-seniyye Kostantıniyyeti’l-mahmiye mahallâtından Sahaf Süleyman Mahallesi’nde sâkin iken bundan akdem vefât eden merhûm Hasan Bey b. Abdullah’ın verâseti zevce-i metrûkesi Fâtıma bt. Abdullah ve sulbiye kebîre kızı Âişe nâm hatunlar ile li-ebeveyn karındaşı oğlu Ahmed Çelebi b. Abdüddeyyan nâm bevvâb-ı sultânîye münhasıra olup muhallefâtının sekiz sehmden bir sehmi zevcesi mezbûre Fâtıma’ya dört sehmi mezbûre Âişe’ye ve üç sehmi mezbûr Ahmed Çelebi’ye isâbet eylediği şer‘an zâhir ve müte‘ayyen oldukdan sonra mezbûretân Fâtıma ve Âişe taraflarından ikrâr-ı âti’l-beyâna vekîl olup vekâleti hasm-ı câhid-i şer‘î mahzarında mezbûretânın zâtlarını ma‘rifet-i şer‘iye ile ârifân olan el-Hâc Osman b. Abdullah ve Aşcı Mustafa b. Nurullah şehâdetleri ile şer‘an sâbite olan Mehmed Bey b. Ramazan mahfil-i kazâda işbu sâhibetü’l-kitâb Alime Hatun bt. Hüseyin mahzarında bi’l-vekâle ikrâr-ı tâm ve takrîr-i kelâm edip mahalle-i mezbûrede vâki‘ bir tarafı fahrü’l-müderrisîni’l-kirâm Hüsamzâde Mehmed Efendi mülkü ve bir tarafı Havvâ Hatun Vakfı ve bir tarafı ba‘zan merkūm Ahmed Çelebi’nin kendi mülkü ve ba‘zan mülk-i mevrûsu ve bir tarafı tarîk-i âm ile mahdûd bennâ zirâ‘ı ile bi-hesâb-ı şatrancî üç yüz zirâ‘ arsa üzerine mebnî tabaka-i ulyâda iki bâb oda ve bir orta sofa ve bir yan sofa ve etrâfında iki dehlîz ve tabaka-i vustâda iki oda ve kezâlik bir orta sofa ve bir yan sofa ve iki ve tabaka-i süflâda bir matbah ve bir bi’r-i mâ ve bir kenîf ve zokak kapısını müştemil müteveffâ-i mezbûr Hasan Bey’in muhallefâtından hîn-i taksîmde müvekkiletân-ı mezbûretâna bâlâda zikr olunan beş sehm hisse-i şer‘iyyeleri mukābelesinde isâbet edip yedlerinde olan hüccet-i şer‘iyyeleri mûcebince mülk-i mevrûsları olan menzil-i mahdûd-ı mezbûru cümle tevâbi‘ ve levâhıkı ve kâffe-i menâfi‘ ve merâfıkı ile mezbûre Alime Hatun’a yüz bin nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr yüz bin akçeyi yedinden bi’t-tamam ve’l-kemâl ahz u kabz eylediler, ba‘de’l-yevm menzil-i mahdûd-ı mezkûrda a[lâ]kaları kalmayıp mezbûre Alime Hatun’un mülk-i müşterâsı olmuşdur, keyfe mâ teşâ’ ve tehtâr mutasarrıfe olsun dedikde vekîl-i mezbûr Mehmed Bey’i ikrâr-ı meşrûhunda mezbûre Alime Hatun vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu.

Fi’l-yevmi’s-sâbi‘ min-Zilka‘deti’ş-şerife li-sene selâse ve sittin ve elf.

Şuhûdü’l-hâl: el-Hâc Mustafa b. Hasan, Hasan Halîfe el-müezzin, Nuh Çelebi b. el-Hâc Mustafa, Mehmed Çelebi b. el-Hâc Mustafa ve gayruhum mine’l-huzzâr.