İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 76 Hüküm no: 42 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Tayyib b. es-Seyyid Mustafa’nın tütüncü dükkanı gedik hissesi ve aletlerini Duhânî es-Seyyid Mehmed’e sattığı Ma‘rûz Ma‘den kaleminde mu‘teber gediklerden olup İstanbul’da Kırkdört kapısı kurbünde kâ’in bir bâb tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mutasarrıfı sâhib-i arzuhâl es-Seyyid Tayyib b. es-Seyyid Mustafa nâm kimesne meclis-i şer‘-i kavîmde duhancı esnâfının kethüdâları İbrahim Ağa b. Ahmed ve yiğitbaşıları es-Seyyid Mehmed b. Yusuf hâzırân oldukları hâlde mutasarrıf olduğu âlât-ı mezkûresini kethüdâ ve ustaları ma‘rifetleriyle Duhânî es-Seyyid Mehmed b. es-Seyyid Numan nâm kimesneye seksen guruş semen-i makbûza bey‘ ve temlîk ve teslîm ol dahî ber-vech-i muharrer iştirâ ve temellük ve tesellüm ve kabûl eyledikden sonra müşterî-i merkûm es-Seyyid Mehmed takrîr-i kelâm edip dükkân-ı mezkûr dahî bâyi‘-i mezbûrun tasarrufunda olup dükkân-ı mezkûrun ebniyesini tağyîr ve âhar kimesneyi iskân etmekle şurût-ı mer‘iyyemiz üzre gedik-i mezkûru civârında Acemoğlanı meydanı kurbünde kâ’in merhûm Mustafa Paşa Konağı tahtında çeşmeye muttasıl müşâhereten müste’ciri olduğum bir bâb dükkâna nakl ve ber-vech-i muharrer kalemine kayd olunmak murâdımdır dedikde bu misillü âhar mahalle gedik nakli şurût-ı mer‘iyyelerinden olduğu derkenârdan müstefâd ve kethüdâ ve yiğitbaşı mezbûrânın ihbârlarıyla zâhir olmağla mahall-i evvelde gedik kaydı ilgâ ve mezbûr es-Seyyid Tayyib üzerinde olan kaydı ref‘ ve terkîn ve mahall-i sânîde mu‘teber olmak üzere mezbûr es-Seyyid Mehmed yedine sûret i‘tâ olunmak ricâsında oldukları huzûr-ı âlîlerine i‘lâm olundu. Fî 21 Saferü’l-hayr sene 1202.