İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 77 Hüküm no: 43 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Bedros’un varislerinin simkeş dükkanındaki gedik hisse ve aletlerini Karamatos v. Kirkor’a sattıkları Ma‘rûz Sâdır olan fermân-ı âlîlerine imtisâlen arzuhâl eden Oseb ve Asvadar ve Setrak evlâd-ı Bedros nâm üç nefer zimmîler meclis-i şer‘-i münîrde Sîmkeşhâne Emîni Halil Efendi tarafından vekîli Mustafa Ağa hâzır olduğu hâlde simkeş ustalarından arzuhâlde mezkûrü’l-ism Karamatos v. Kirkor nâm zimmî muvâcehesinde her biri takrîr-i kelâm edip bin yüz doksan senesinde hâlik olan babamız mersûm Bedros’un verâseti zevcesi Losek bt. Toma ile vâlidesi Elmas bt. Panosa ve sulbiye sagîre kızı Talita ve Kalurye’ye ve bize münhasıra oldukdan sonra tereke-i hâlik-i mersûmdan [10b] simkeşhânede tabaka-i ulyâda Emin Ağa odasına muttasıl bir bâb oda derûnunda mevcûde beyne’l-hıref gedik ta‘bîr olunur bir çift sagîr ve bir çift çarhlar ve bir kılâbdan çıkrığı ve bir tav çıkrığı ve bir çırçır çıkrığı ve bir destgâh ve bir el çıkrığı ve bir terâzi ve ma‘a derâhim ve yirmi beş pûşî ve on tunclu ve elli aded çehre ile Bezâzistân-ı atîk ebvâbından Fincancılar kapısında vâki‘ bir bâb sîmkeş dükkânı derûnunda mevcûde kezâlik gedik ta‘bîr olunur bir terâzi ma‘a derâhim ve bir pîş-tahta ve bir akçe tahtası ve kırk aded pûşî ve bir el çıkrığı ve bir mikrâsı ve bir kilim ve bir minder ve bir altın veznesi bizim ile verese-i mersûmâna mevrûs olup âlât-ı mezkûrelerin târîh-i merkûmda semen-i misilleri dört bin guruş iken zevce-i mesfûre Losek kendi hisse-i irsiyyesini asâleten ve kızı mezbûre Talita’nın hissesini dahî vesâyeten ve ümm-ı mersûme Elmas asâleten ve biz ve mezbûre Kalurye târîh-i merkûmda sagîre bulunmamızla bâ-hüccet-i şer‘iyye vasî-i mansûbemiz olan min ciheti’l-üm ceddemiz ve Asliska Nasrâniye vesâyeten âlât-ı mezkûrelerin mecmû‘unu noksan fâhiş ile iki bin guruşa mersûm Karamatos zimmîye bâ-ma‘rifet-i şer‘ bey‘ ve temlîk ve teslîm edip lâkin vasîmiz mesfûrenin ber-vech-i muharrer mersûmetân ile ma‘an bizim hissemizi noksân fâhiş ile olan bey‘-i mezkûru sahîh ve mu‘teber olmamağla medfû‘u olan mezkûrdan hissemize isâbet eden meblağı bizden ahz ve âlât-ı mezkûreden hisse-i ırsiyemizi bize teslîme mersûm Karamatos zimmîye tenbîh olunmak murâdımızdır deyü ba‘de’d-da‘vâ ve’l-istintâk mersûm Karamatos zimmî cevâbında oda ve dükkân-ı mezkûr derûnlarında âlât-ı mezkûre târîh-i mezkûrede ma‘rifet-i şer‘le beyne’l-esnâf müzâyede olundukda iki bin guruşda benim üzerimde karâr edip ziyâde ile tâlib-i âharı zuhûr etmediğinden gayrı meblağ-ı mezkûr iki bin guruşu âlât-ı mezkûrenin semen-i misilleri olduğunu esnâf-ı mezbûre ustaları ba‘de’l-ihbâr ber-vech-i muharrer bâ-ma‘rifet-i şer‘ bana bey‘ ve yedime bir kıt‘a hüccet-i şer‘iyye i‘tâ olunmuşdur deyü târîh-i mezkûrede ber-vech-i muharrer ziyâde kıymeti olduğunu inkârından mâ‘adâ fi’l-asıl simkeş gedikleri seksen iki aded olup mürûr-ı zamân ile yüz yirmi adede bâliğ ve umûr-ı esnâfın ihtilâline bâ‘is olmağın doksan sekiz senesi bâ-emr-i âlî simkeşhâne emîni ma‘rifetiyle kadîmi üzre müceddeden seksen iki aded gedik tertîb ve ustalardan cümlenin muhtârı olan seksen iki usta intihâb ve yedlerine müceddeden gedik tasarruflarıçün sûret i‘tâ olunmuşdur deyü takrîrine muvâfık emr-i âlî ibrâzından başka mesfûrân Oseb ve Sitrak zimmîler ba‘de’l-bülûğ bey‘-i mezkûru mücîzler olup hattâ semen-i mezkûreden hisse-i ırsiyyelerini huzûr-ı şer‘de vasîleri yedinden tamâmen ahz u kabza ve her biri hüccet-i şer‘iyye i‘tâ etmişlerdir dedikde mersûmân Oseb ve Sitrak’den her biri hisse-i ırsiyyelerini ahz u kabz ve mücîzler olduklarını ikrârlarından mâ‘adâ henüz âlât-ı mezkûrenin târîh-i merkûmda ber-vech-i muharrer ziyâde kıymetleri olduğunu bir vecihle beyâna kādir olmayıp tahlîfe dahî tâlibler olmamalarıyla mersûmûn Oseb ve Sitrak ve Asvador zimmîlerden her biri bî-vech mu‘ârazadan men‘ olundukları huzûr-ı âlîlerine i‘lâm olundu. Fî 3 Rebî‘ü’l-evvel sene 1202.