İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 78 Hüküm no: 44 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mustafa Ağa b. İbrahim’in tasarrufunda olan Yahudihanelerin Şerîfe Fatma bt. el-Hâc Mehmed Hatun’a satıldığı ve borcun tahsil edildiği Ma‘rûz İstanbul’da Hocapaşa mahallesinde sâkine sâhibe-i arzuhâl ma‘rifetü’z-zât Şerîfe Fatma bt. el-Hâc Mehmed Hatun meclis-i şer‘-i münîrde zikri âtî vakfın mütevellîsi Hasan Ağa hâzır olduğu hâlde zikri âtî Yahûdîhânelere vaz‘-ı yedi mütehakkık olan hâssa hasekîlerinden hâlâ Ödemiş Voyvodası Mustafa Ağa b. Mehmed tarafından husûs-ı âtîde husûmet ve redd-i cevâba bâ-hüccet-i şer‘iyye vekîl olduğu zeyl-i hüccetde isimleri mezkûr el-Hâc Mehmed b. Mustafa ve el-Hâc Ahmed b. Süleyman şehâdetleriyle sâbit olan İsmail Efendi b. Abdülcelil muvâcehesinde İstanbul hısn-ı ebvâbından Ayazma Kapısı hâricinde el-Hâc Davud mescid-i şerîfi Vakf-ı musakkafâtından mahrûse-i Galata’da Sandıkçılar kurbünde vâki‘ iki kıt‘a temessük mantûklarınca her biri ma‘lûmü’l-hudûd ve’l-müştemilât beher şehr altmış akçe icâre-i mü’eccele ile bi’l-icâreteyn tasarrufumda olan iki bâb Yahûdîhânemi bin yüz doksan senesi Rebî‘ü’l-ûlâ gurresinde işbu hâzıratü bi’l-meclis Şerîfe Hafize nâm hatunun babası müteveffâ Mustafa Ağa b. İbrahim’in hayâtında yedinden iktirâz ve kabz eylediğim bin beş yüz elli guruşun yedi yüz guruşunu kendiye edâ bâkî sekiz yüz elli guruş deynim mukâbelesinde deynim olan meblağ-ı mezkûr sekiz yüz elli guruşu her ne zamân kendiye edâ eder isem yine bana ferâgat etmek üzre müteveffâ-yı mezbûre hayâtında bâ-re’y-i mütevellî vefâ-i fâriga olmuşiken müteveffâ-yı mezbûr dahî bin yüz doksan üç senesi Saferü’l-hayrı’nın yedinci günü mârrü’z-zikr Yahûdîhâneleri benim haber ve icâzetim olmaksızın müvekkil-i merkûm Hasekî Mustafa Ağa’ya kat‘î olarak fuzûlî ferâğ ve teslîm etmekle ol dahî [11a] fuzûlî zabt ve tasarruf eder vekîl-i mezbûre suâl olunup Yahûdîhâne-i mezkûrları bana teslîme vekîl-i merkûma ve deyn-i mezkûrumu müteveffâ-yı mezbûrun veresesine ba‘de’l-edâ yine benim üzerime tahrîre mütevellî-i merkûma tenbîh olunmak murâdımdır deyü ba‘de’d-da‘vâ ve’l-istintâk vekîl-i mezbûr cevâbında işbu yedimde olup doksan üç senesi Cumâde’l-ûlâsı’nın on sekizinci günü târihiyle müverrah ve ol târîhde İstanbul kadısı bulunan Arabzâde Ahmed Atâullah Efendi’nin sicilinden muhrec bir kıt‘a i‘lâmı nâtık olduğu üzre müdde‘iyye-i mezbûre ferâğ-ı mezkûru vefâ’ olmağla Yahûdîhâne-i mezkûrları efendi-i mûmâileyh huzûrunda müteveffâ-yı mezbûr hâzır olduğu hâlde müvekkil-i mezbûr Hasekî Mustafa Ağa’dan taleb ve da‘vâ eylediğinde müdde‘iyye-i mezbûrenin ferâğ-ı mezkûru vefâ’ olup ba‘dehû müteveffâ-yı mezbûrun müvekkil-i merkûm Hasekî Mustafa Ağa’ya olan ferâğını mücîze olmadığını i‘tirâf birle Yahûdîhâne-i mezkûrları bâ-ma‘rifet-i mütevellî yine müdde‘iyye-i mezbûreye fâriğ olduğunu müvekkil-i merkûm Hasekî Mustafa Ağa’nın ikrâr ve i‘tirâfını hâvî ibrâz eylediği i‘lâm-ı mezkûrun mazmûnunu ve ferâğ-ı evvel-i mezbûrun vefâ’en olduğunu mukırr ve mu‘terif iken mücerred târîh-i i‘lâm-ı mezkûrdan üç ay mukaddem müteveffâ-yı mezbûrun ber-vech-i muharrer müvekkil-i mezbûra ferâgatinde müdde‘iyye-i mezbûre hâzıra ve mucîze olmuşidi deyü tasaddî eylediği def‘-i meşrû‘ ve mu‘teber olmağla mûcebince meblağ-ı mezbûr sekiz yüz elli guruşu müteveffâ-yı mezbûrun veresesine ba‘de’l-edâ Yahûdîhâne-i mezkûrları yine müdde‘iyye-i mezbûre Şerife Fatma Hatun üzerine tahrîre mütevellî-i merkûma ve mârrü’l-beyân Yahûdîhâneleri müdde‘iyye-i mezbûreye teslîme vekîl-i mezbûr İsmail Efendi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 12 Rebî‘ü’l-evvel sene 1202. Derkenar: Yahûdîhâne