İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 80 Hüküm no: 45 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi b. Mehmed’in evinin lağım sularının Zeyneb bt. Abdullah’ın evine aktığı için kapatılmasını talep ettiği Ma‘rûz Sâdır olan fermân-ı âlîlerine imtisâlen cânib-i şer‘-i enverden mürsel İkinci Kâtib Ahmed Efendi hâssa mi‘mârı hulefâsından el-Hâc Ubeydullah ve Ahmed Halîfeler ile İstanbul’da Sultan Mehmed Câmi-i Şerîfi civârında Üçemirler Türbesi ittisâlinde vâki‘ sâhibe-i arzuhâl Zeyneb bt. Abdullah nâm hatunun Osman Efendi Vakfı’ndan bi’l-icâreyeten mutasarrıf olduğu menzile varıp huzûr-ı Müslimînde ba‘de akdi’l-meclis ma‘rifetü’z-zât mezbûre Zeyneb Hatun meclis-i ma‘kûd-ı mezkûrda zikri âtî vakfın mütevellîsi eş-Şeyh es-Seyyid Mahmud Efendi hâzır olduğu hâlde menzil-i mezkûr ittisâlinde vâki‘ merhûm Azîz Mehmed Efendi Vakfı’ndan bir bâb menzile mutasarrıf olan derûn-ı mezkûrü’l-ism kuzâtdan Osman Efendi b. Mehmed tarafından vekîl-i müseccel-i şer‘îsi Abdullah Ağa b. İbrahim mahzarında işbu akd-i meclis olunan menzilimin kable’l-harîk kenîfleri çirkâbı müvekkil-i mezbûr Osman Efendi’nin menzil-i derûnundan bi-hakkın ceryân edegelmişken müvekkil-i mezbûr Osman Efendi ba‘de’l-harîk menzilini binâ eyledikde lağamını sed etmekle ke’l-evvel ceryânına mumâna‘at etmemek üzre vekîl-i mezbûra tenbîh olunmak matlûbumdur deyü da‘vâ ol dahî inkâr ve ol vecihle beyinlerinde ba‘de vukû‘i’l-münâza‘a elhâletü hâzihî vekîl-i mezbûr müdde‘iyye-i mezbûrenin menzil-i kenîflerinin çirkâbı müvekkil-i mezbûr Osman Efendi’nin menzili derûnundan ceryâna bi’l-vekâle izin verdikde müdde‘iyye-i mezbûre dahî râzı ve bu vecihle kat‘-ı münâza‘a eyledikleri ba‘de’l-inhâ huzûr-ı âlîlerine i‘lâm olundu. Fî 24 Saferü’l-hayr sene 1202.