İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 80 Hüküm no: 46 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Nesibe Hanım’ın yanan bir handa kahveci dükkanını kira ile işlettiği ancak hanın yanması ile yeniden inşa edilen handa kiracı olarak kalmak istediği hakkında açtığı davanın reddedildiği Ma‘rûz Sâdır olan fermân-ı âlîlerine imtisâlen sâhib-i arzuhâl Osman b. Hüseyin nâm kimesne meclis-i şer‘-i münîrde zikri âtî odanın bi’l-icâreteyn mutasarrıfesi Hadîce Nesîbe Hânım bt. Şeyhü’l-islâm-ı esbak merhûm Mehmed Said Efendi tarafından husûs-ı âtîde husûmet ve redd-i cevâba vekîl olduğu zât-ı mûmâileyhâyı bi’l-ma‘rifeti’ş-şer‘iyye ârifân olan Hasan b. Ahmed ve es-Seyyid Ahmed b. Mahmud şehâdetleriyle sâbit olan Hâfız Mustafa Efendi b. İbrahim ile terâfu‘larında Papaszâde merhûm Mustafa Efendi Vakfı’ndan İstanbul’da Destereciler sûkı zahrında kâ’in bir bâb hân odalarında zokak kapısı mukâbilinde vasatda vâki‘ bir bâb oda derûnunda mevcûde kahveci gediği âlâtı benim mülküm olmağla [11b] bi’l-icâreteyn mutasarrıfesi müvekkile-i mûmâileyhâ tarafından kirâ ile ben sâkin iken harîk vukû‘unda hân-ı mezkûr[da] benim mülküm olan âlât-ı mezkûre külliyen muhterik oldukdan sonra müvekkile-i mûmâileyhâ hân-ı mezkûru müceddeden binâ ve oda-i mezkûre yeniçeri iskân etmekle kable’l-harîk ben ber-vech-i muharrer kahvecilik ile sâkin olduğuma binâ’en oda-i mezkûru yine bana îcâra vekîl-i merkûma tenbîh olunmak murâdımdır deyü da‘vâya tasaddî eylediğinde vekîl-i mezbûr dahî inkârından mâ‘adâ müdde‘î-i mezbûr yedinde sened-i şer‘î olmayıp ve aklâmda mukayyed mu‘teber gediklerden olmadığını mukırr ve mu‘terif iken mücerred harîkden mukaddem ben ber vech-i muharrer kahveci olmamla yine bana îcâr eylesin deyü tasaddî eylediği da‘vâsı meşrû‘â ve mu‘tebere olmamağla bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 6 Rebî‘ü’l-evvel sene 1202. Derkenar: Menzil da‘vâsı meşrûha olduğu